کامرس نیوز*

افتخار علی ملک سارک چیمبر کے سینئیر نائب صدر مقرر فیصلہ چالیس سال پر محیط انکی خدمات کے مد نظر کیا گیا[سارک ممالک کو قریب لانے کی کوششیں بڑھائیں گی[افتخار علی ملک

پیر اپریل 15:40

اسلام آباد(اُردو پوائنٹ اخبارتازہ ترین۔ 30 اپریل2018ء) یونائیٹڈ بزنس گروپ کے چئیرمین افتخار علی ملک کو سارک چیمبر آف کامرس اینڈ انڈسٹری کا سینئیر نائب صدر مقرر کر دیا گیا ہے۔ انکی تقرری کا متفقہ فیصلہ سارک چیمبر کے صدر روآن ایدرسنگھے اور تمام نائب صدور نے انکی چالیس سالہ خدمات اور سارک ممالک کو قریب لانے کی کوششوںکے اعتراف کے طور پر کیا۔

افتخار علی ملک اس سے قبل لاہور چیمبر اور وفاقی چیمبر کے صدر رہ چکے ہیں جبکہ انھوں نے سارک چیمبر کے نائب صدر کی حیثیت سے دس سال تک خدمات سرانجام دی ہیں اور اس وقت وہ ایف پی سی سی آئی کے برسر اقتدار یونائیٹڈ بزنس گروپ کے چئیرمین بھی ہیں۔ اس موقع پر افتخار علی ملک نے کہا کہ وہ کاروباری برادری کے اعتماد پر انکے شکر گزار ہیں۔

(جاری ہے)

وہ آئندہ بھی اسی جزبے اور لگن سے ملک و قوم کی خدمت اور سارک ممالک کو قریب لانے کی بھرپور کوششیں کرتے رہیں گے تاکہ یہاں کے عوام کا معیار زندگی بہتر ہو سکے۔

انھوں نے کہا کہ ایشیائی ممالک تیزی سے عالمی منڈی میں قدم جما رہے ہیں اور انکی شرح نمو دنیا بھر میں سب سے زیادہ ہے تاہم سیکورٹی اور سیاسی معاملات اور محصولاتی و غیر محصولاتی رکاوٹیں ترقی کی رفتار بڑھانے میں رکاوٹ ہیں جنھیں مل کر دور کرنے کی ضرورت ہے۔ انھوں نے کہا کہ سارک کے خطے میںترقی کا بڑا پوٹینشل موجود ہے جس کے حصول کیلئے سب نے مل کر کام کرنا ہو گا۔

انھوں نے کہا کہ مختلف ممالک کے مابین تجارتی معاہدوں کو متوازن کرنے کی ضرورت ہے کیونکہ ان میں امیر ممالک کو فائدہ ہوتا ہے جبکہ غریب ممالک کیلئے یہ نا موافق ہیں۔ اس موقع پر ایف پی سی سی آئی کے صدر غضنفر بلور، سینئیر نائب صدر سید مظہر علی ناصر، نائب صدور کریم عزیز ملک اور عاطف اکرام شیخ اور چئیرمین کوآردینیشن ملک سہیل نے افتخار علی ملک کی کدمات کو سراہا اور کہا کہ وہ اپنی بے لوث خدمات ی وجہ سے کاروباری برادری میں انتہائی مقبول ہیں اور انھوں نے کبھی کوئی الیکشن نہیں ہارا۔

انھوں نے اپنی زندگی کاروباری برادری اور انسانیت کی خدمت کیلئے وقف کر رکھی ہے اور سارک چیمبر کے اول نائب صدر کی حیثیت سے انکا تقرر پاکستان،، ایف پی سی سی آئی اور یونائیٹڈ بزنس گروپ کیلئے ایک اعزاز ہے۔ اسلام آباد میں ایک ارب روپے کی لاگت سے سارک چیمبر کی دس منزلہ عمارت تکمیل کے قریب پہنچ گئی ہے جس میں افتخار علی ملک کی ذاتی دلچسپی اور مالی تعاون قابل ستائش ہے۔ ۔