لہسن صحت کیلئے بہت فائدہ مند ہے، ماہرین

قصور۔2 مئی(اُردو پوائنٹ اخبارتازہ ترین - اے پی پی۔ 02 مئی2018ء) وہ چیز جوہرپاکستانی کچن میں موجود ہوتی ہے اوربیشتر کھانوں میں استعمال ہوتی ہے درحقیقت کینسر‘امراض قلب اورذیابیطس ٹائپ ٹو جیسے جان لیوا امراض سے تحفظ فراہم کرسکتی ہے اور وہ چیز ہے لہسن جسے صدیوں سے مختلف گھریلو ٹوٹکوں میں مختلف طبی مسائل دورکرنے کیلئے استعمال کیاجارہاہے تاہم اب برطانوی محققین نے اسے صحت کیلئے بھی بہت زیادہ فائدہ مند قرار دیدیاہے ۔

ناٹنگھم یونیورسٹی کی تحقیق میں بتایا گیا کہ لہسن کو کھانا صحت کیلئے بہت زیادہ فائدہ مندہے ۔تحقیق میں بتایا گیاکہ ہر کچن میں موجود اس عام چیز کوکھانا کینسر‘ امراض قلب اورذیابیطس ٹائپ ٹو جیسے امراض کا خطرہ کم کیاجاسکتاہے تاہم یہ فائدہ لہسن کو پکانے کے طریقے سے ہی حاصل ہوتاہے۔

(جاری ہے)

تحقیق میں بتایا گیا کہ لہسن میں موجود کئی طرح کے کمپائونڈ اسے کاٹنے کے دوران خارج ہوتے ہیں اور یہی وجہ ہے کہ اس کے صحت پر اثرات میں کمی بیشی واقع رہتی ہے۔

محققین نے تسلیم کیا کہ ابھی بھی وہ یہ جان نہیں سکے کہ لہسن کو کھانے کا کون سا طریقہ سب سے زیادہ فائدہ مندثابت ہوسکتاہے۔یعنی وہ ایسے شواہدفراہم نہیں کرسکے کہ کچی لہسن کو کھانا زیادہ فائدہ ہے یا غذا میں شامل کرکے استعمال کرناتاہم ان کا یہ ماننا ضرورتھا کہ یہ صحت کیلئے فائدہ مندہے۔محققین کا کہناتھا کہ یہ بلڈپریشر کونمایاں حدتک کم کرنے میں مدد دیتاہے جبکہ اس میں کینسر سے بچائو والے کئی کمپائونڈ موجود ہیں‘جانوروں پرتجربات کے دوران بلڈشوگر لیول میں کمی دیکھی گئی تاہم اب تک انسانوں پر اسے آزمایا نہیں گیا۔