ڈربی شائر نے رواں برس شیڈول ٹی ٹونٹی ٹورنامنٹ کیلئے وہاب ریاض کی خدمات حاصل کر لیں

بدھ مئی 17:52

ڈربی شائر نے رواں برس شیڈول ٹی ٹونٹی ٹورنامنٹ کیلئے وہاب ریاض کی خدمات ..
لندن ۔ (اُردو پوائنٹ اخبارتازہ ترین۔ 02 مئی2018ء) انگلش کائونٹی کرکٹ کلب ڈربی شائر نے رواں برس شیڈول وائٹالٹی ٹی ٹونٹی ٹورنامنٹ کیلئے پاکستانی فاسٹ بائولر وہاب ریاض کی خدمات حاصل کر لیں۔ معاہدے کے تحت وہ 10 میچز میں ڈربی شائر کی نمائندگی کریں گے۔

(جاری ہے)

32 سالہ وہاب ریاض نے گزشتہ سال اکتوبر میں سری لنکا کے خلاف ٹیسٹ میچ میں آخری بار ملک کی نمائندگی کی تھی تاہم ناقص فارم کی وجہ سے انہیں ٹیم سے دوری کا سامنا ہے اور ٹیم کوچ مکی آرتھر بھی ان پر تنقید کر چکے ہیں، انہوں نے دورہ انگلینڈ سے قبل بھی کہا تھا کہ وہاب نے گزشتہ دو برسوں کے دوران اپنی کارکردگی سے ٹیم کو فتوحات نہیں دلوائیں اسلئے انہیں سکواڈ سے ڈراپ کیا گیا، ڈربی شائر سے معاہدے کے بعد وہاب ریاض نے امید کا اظہار کیا کہ انگلینڈ میں شیڈول ٹورنامنٹ ان کی ٹیم میں دوبارہ واپسی میں مددگار ثابت ہو گا اور ہدف کے حصول کیلئے وہ خوب جان لڑائیں گے۔

ڈربی شائر کرکٹ ایڈوائزر کم بارنیٹ نے کہا کہ وہاب ریاض ماہر بائولر ہیں اور انٹرنیشنل کرکٹ کا وسیع تجربہ رکھتے ہیں، امید ہے کہ وہ ٹیم کو فتوحات دلانے میں کردار ادا کریں گے۔