لاہور ہائیکورٹ: عدلیہ مخالف ریلی، ایم این اے وسیم اختر سمیت لیگی رہنما 4 مئی کو طلب

بدھ 2 مئی 2018 18:44

لاہور(اُردو پوائنٹ اخبارتازہ ترین - آن لائن۔ 02 مئی2018ء) لاہور ہائیکورٹ نے قصور میں عدلیہ مخالف ریلی اور ججز کے خلاف نازیبا الفاظ استعمال کرنے کے خلاف درخواست پر سماعت کرتے ہوئے ایم این اے وسیم اختر سمیت دیگر ن لیگی عہدیداران 4 مئی کو طلب کر لئے۔لاہور ہائیکورٹ کے جسٹس مظاہر علی اکبر نقوی کی سربراہی میں فل بنچ نے قصور ڈسٹرکٹ بار کے صدر مرزا نسیم کی درخواست پر سماعت کی۔

(جاری ہے)

درخواست گزار کی جانب سے موقف اختیار کیا گیا کہ 13 اپریل کو قصور کشمیر چوک پر سابق وزیراعظم کی نااہلی پر ریلی نکالی گئی، ریلی کی قیادت ن لیگ کے ایم این اے وسیم اختر، ایم پی اے صفدر انصاری نے کی۔ ریلی میں شریک ن لیگی قائدین اور کارکنان نے عدلیہ کے خلاف تضحیک آمیز نعرے بازی کی لہٰذا ملزموں کیخلاف توہین عدالت کی کارروائی کی جائے۔ عدالت نے متعلقہ آر پی او کو ایم این سے سمیت دیگر کی حاضری یقینی بنانے کا حکم دیتے ہوئے سماعت 4 مئی تک ملتوی کر دی۔