رواں ہفتے کے دوران ملک کے بالائی اور وسطی علاقوں میں وقفے وقفے سے تیز ہوائوں اور گرج چمک کے ساتھ بارش کی پیشگوئی

زیادہ سے زیادہ درجہ حرارت موہنجوداڑو 48، سبی، سکرنڈ، شہیدبینظر آباد 47، دادو، تربت میں 46 ڈگری سینٹی گریڈ ریکارڈ کیا گیا

بدھ 2 مئی 2018 23:19

اسلام آباد ۔ (اُردو پوائنٹ اخبارتازہ ترین - اے پی پی۔ 02 مئی2018ء) رواں ہفتے کے دوران ملک کے بالائی اور وسطی علاقوں میں وقفے وقفے سے تیز ہوائوں اور گرج چمک کے ساتھ بارش کی پیشگوئی کی گئی ہے۔ محکمہ موسمیات کے مطابق آج (جمعرات) خیبرپختونخوا (مالاکنڈ، ہزارہ، پشاور، مردان، کوہاٹ بنوں، ڈی آئی خان ڈویڑن)، راولپنڈی، گوجرانوالہ، لاہور، سرگودھا، فیصل آباد، ساہیوال ڈویژن، فاٹا، اسلام آباد، گلگت بلتستان اور کشمیر میں چند مقامات تیز ہوائوں/آندھی اور گرج چمک کے ساتھ وقفے وقفے سے بارش کا امکان ہے۔

ملتان، ڈی جی خان اور بہاولپور ڈویژن میں گرد آلود/تیز ہوائیں چلنے کا بھی امکان ہے۔ جنوبی پنجاب اور سندھ میں موسم شدید گرم اور خشک رہے گا۔ گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا تاہم مالاکنڈ، ہزارہ، بنوں، فیصل آباد، سرگودھا ڈویژن میں چند مقامات پر تیزہوائوں اور گرج چمک کے ساتھ بارش ہوئی۔

(جاری ہے)

سب سے زیادہ بارش خیبرپختونخوا: کالام 12، بنوں11، میرخانی، چترال 09، دروش 08، پٹن 05، لوئردیر02، پنجاب: بھکر، جوہرآباد، جھنگ 03 اور فیصل آباد میں 02 ملی میٹر بارش ریکارڈ کی گئی۔

اس دوران ملک میں زیادہ سے زیادہ درجہ حرارت موہنجوداڑو 48، سبی، سکرنڈ، شہیدبینظر آباد 47، دادو، تربت میں 46 ڈگری سینٹی گریڈ ریکارڈ کیا گیا۔ بدھ کو اسلام آباد میں پولن کی تعداد 347فی مکعب میٹر رہی۔