نارووال سپورٹس سٹی منصوبہ :نیب کا وزیر داخلہ احسن اقبال کیخلاف شکایات کی تصدیق کرانے کا فیصلہ

جمعرات 3 مئی 2018 14:56

اسلام آباد(اُردو پوائنٹ اخبارتازہ ترین - آن لائن۔ 03 مئی2018ء) قومی احتساب بیورو ( نیب) نے نارووال میں اربوں روپے لاگت سے تعمیر ہونے والے سپورٹس سٹی منصوبے میں مبینہ بیضابطگیوں پر وزیر داخلہ احسن اقبال کے خلاف شکایات کی تصدیق کرنے کا فیصلہ کرلیا۔میڈیا رپورٹ کے مطابق نیب کی جانب سے جاری بیان میں کہا گیا کہ بیورو کے چیئرمین جسٹس (ر) جاوید اقبال نے ہدایت دی ہیں کہ حکومتی فنڈز میں مبینہ طور پر ہونے والی خورد برد کے خلاف شکایات کی تحقیقات کی جائیں۔

(جاری ہے)

واضح رہے کہ نارووال سپورٹس سٹی منصوبے ( این ایس سی پی ) کی تعمیر پر حیرت انگیز طور پر 6 ارب روپے کی لاگت آئے گی۔چیئرمین نیب کی جانب سے اس منصوبے کی تعمیر میں قوانین کی خلاف ورزی کا نوٹس لیا گیا، اس کے علاوہ اس منصوبے میں سکیورٹی معاملات بھی ایک مسئلہ ہے اور سپورٹس سٹی کی 44 ایکڑ زمین کو بھارتی سرحد سے صرف 800 میٹر کے فاصلے پر تعمیر کیا جارہا۔پی ایس ڈی پی کی 19-2018 کی رپورٹ کے مطابق اس منصوبے کی لاگت 2.9 ارب روپے رکھی گئی تھی، جس میں سے 2.5 ارب روپے سے زائد پہلے ہی خرچ ہوچکے جبکہ بقیہ 46 کروڑ 70 لاکھ روپے آئندہ مالی سال میں جاری کیے جائیں گے۔