مسلم لیگ(ن) کراچی ڈویژن کے رہنمائوں کاسینئر مسلم لیگی رہنمارانا صفدر کے انتقال پرافسوس کا اظہار

پرویز مشرف کے دور آمریت میں ان کی جدوجہد نے نئی تاریخ رقم کی، خواجہ طارق نذیر

جمعرات 3 مئی 2018 19:08

کراچی (اُردو پوائنٹ اخبارتازہ ترین - این این آئی۔ 03 مئی2018ء) پاکستان مسلم لیگ (ن) کراچی ڈویژن کے جنرل سیکرٹری خواجہ طارق نذیر ، نائب صدرحاجی شاہجہان،سید منور رضا،ڈپٹی انفارمیشن سیکرٹری خواجہ نیئرشریف،ندیم اخترآرائیں،ناصرالدین محموداور محمدصابرقریشی نے سینئر مسلم لیگی رہنمااور کراچی ڈویژن کے نائب صدر رانا صفدر کے انتقال پر اظہار رنج و غم کرتے ہوئے کہا ہے کہ مرحوم کی پاکستان اور جمہوریت کے لیے خدمات تادیر یاد رکھی جائیں گی ۔

جنرل (ر) پرویز مشرف کے دور آمریت میں ان کی جدوجہد نے ایک نئی تاریخ رقم اور قید و بند کی صعوبتیں بھی ان کے عزم کی راہ میں حائل نہ ہوسکیں ۔جمعرات کو جاری تعزیتی بیان میں مسلم لیگی رہنماؤں نے کہا کہ جمہوریت کے لیے سیاسی کارکنوں نے ہر دور میں قربانیاں دی ہیں ۔

(جاری ہے)

مسلم لیگ (ن) کراچی ڈویژن کے نائب صدر رانا صفدر کا شمار بھی جمہوریت کے ان ہی سپاہیوں میں ہوتا تھا جنہوںنے ملک میں آئین کی حکمرانی اور جمہوری قدروں کے پاسداری کے لیے بلاکسی خوف و دباؤ کے کام کیا ۔

مسلم لیگ (ن) کی قیادت کو اپنے اس متوالے پر فخر ہے ۔انہوںنے کہا کہ رانا صفدر کا انتقال مسلم لیگ (ن) کے لیے ایک بڑا نقصان ہے اور ان کا خلاتادیر پر نہیں کیا جاسکے گا ۔انہوںنے رانا صفدر کے اہل خانہ سے اظہار تعزیت کرتے ہوئے دعا کی کہ اللہ مرحوم کے درجات بلند کرے اور لواحقین کو صبر جمیل عطا فرمائے ۔