یمن،عرب اتحادی فوج کی بمباری،ایرانی ولبنانی جنگجو ہلاک

دونوں جنگجوحوثیوںکے اسلحہ ساز قرار،یمنی فوج نے باغیوں کی سپلائی لائن کاٹ دی

جمعرات مئی 23:45

صعدہ(اُردو پوائنٹ اخبارتازہ ترین۔ 03 مئی2018ء) یمن میں حوثیوں کے گڑھ سمجھے جانے والے علاقے ’صعدہ‘ میں عرب اتحادی فوج کی بمباری سے ایرانی ولبنانی جنگجو ہلاک ہو گئے،دونوں جنگجوئوں کو حوثیوں کا اسلحہ ساز قرار دیا جا رہا ہے،یمنی فوج نے باغیوں کی سپلائی لائن کاٹ دی۔غیر ملکی میڈیا کے مطابق یمن میں ایران نواز حوثیوں کے گڑھ سمجھے جانے والے علاقے ’صعدہ‘ میں عرب اتحادی فوج کی بمباری میں ایک ایرانی اور ایک لبنانی جنگجو کے مارے جانے کی اطلاعات ہیں۔

دونوں کو حوثیوں کا اسلحہ ساز قرار دیا جا رہا ہے۔’العربیہ’ چینل نے یمن کے عسکری ذریعے کے حوالے سے اطلاع دی ہے کہ صعدہ گورنری میں عرب اتحادی فوج کے طیاروں نے حوثی دہشت گردوں کے ایک ٹھکانے پر بم باری کی جس کے نتیجے میں حوثیوں کیایرانی اور لبنانی دو اسلحہ ساز ہلاک ہوگئے۔

(جاری ہے)

عسکری ذریعے نے بتایا کہ صعدہ میں حوثیوں کے ایرانی اور لبنانی معاونین کی کئی روز سے نگرانی کی گئی۔

دونوں شدت پسند باقم ڈاریکٹوریٹ میں حوثیوں کے ایک گروپ کے ساتھ چھپے ہوئے تھے۔ادھر ایک دوسری پیش رفت میں یمن کی آئینی فوج نے شمالی صعدہ کی باقم ڈاریکٹوریٹ کے اہم علاقے آل صبحان کو باغیوں سے واپس لے لیا ہے۔یمنی فوج کے ایک سینیر عہدیدار بریگیڈیئر صالح قروش نے بتایا کہ بریگیڈ تین اور پانچ کے فوجیوں نے صعدہ کے پہاڑی علاقوں مقیرع، البرکان، جبال آل الحدید، المیمنہ اور آل صبحان کے علاقوں سے باغیوں کو نکال باہر کرنے کے بعد ان کی سپلائی لائن کاٹ دی ہے۔

فوجی افسر کا کہنا تھا کہ تازہ آپریشن میں حوثیوں کا بھاری مقدار میں اسلحہ اور گولہ بارود بھی تباہ کیا گیا ہے۔بریگیڈیئر قروش نے بتایا کہ بریگیڈ 63 کے فوجیوں نے آل صبحان میں حوثی باغیوں کا گھیراؤ کیا اور کارروائی میں متعدد جنگجو ہلاک اور کئی زخمی بھی ہوئے ہیں۔