اسلام آباد میں کرکٹ سٹیڈیم کی جگہ کیلئے پی سی بی کی مدد کرینگے، سپریم کورٹ

اسلام آباد(اُردو پوائنٹ اخبارتازہ ترین - آن لائن۔ 04 مئی2018ء) چیف جسٹس آف پاکستان جسٹس ثاقب نثار نے کہا ہے کہ اسلام آباد سٹیڈیم کی جگہ کے حصول کیلئے پاکستان کرکٹ بورڈ کی مدد کریں گے جبکہ پاکستان کرکٹ بورڈکے چیئرمین نجم سیٹھی نے سپریم کورٹ کو یقین دہانی کروائی ہے کہ اگر اسلام آباد اسٹیڈیم نیشنل پارک کا حصہ ثابت ہوا تو پی سی بی واپس کردے گا۔

تفصیلات کے مطابق چیف جسٹس ثاقب نثار کی سربراہی میں سپریم کورٹ کے 3 رکنی بینچ نے آج اسلام آباد کے علاقے شکر پڑیاں میں کرکٹ اسٹیڈیم کی تعمیر کے معاملے پر سماعت کی۔سماعت کے دوران چیئرمین پی سی بی نجم سیٹھی پیش ہوئے اور عدالت عظمی کو آگاہ کیا کہ اسٹیڈیم کی تعمیر کا منصوبہ 2008 میں شروع ہوا تھا اور جب میں چیئرمین پی سی بی بنا تو کہا گیا کہ اس سائٹ پر اسٹیڈیم تعمیر نہیں ہونا چاہیے،نجم سیٹھی نے کہا کہ سی ڈی اے کی ذمے داری تھی کہ وہ ہمیں نیشنل پارک میں جگہ ہی نہ دیتے،ان کا مزید کہنا تھا کہ اگر اسلام آباد اسٹیڈیم نیشنل پارک کا حصہ ثابت ہوا تو پی سی بی واپس کردے گی،عدالت عظمی نے کہا کہ سی ڈی اے ثابت کرے کہ اسٹیڈیم نیشنل پارک کا حصہ ہے یا نہیں نجم سیٹھی کا کہنا تھا کہ ہم نیشنل پارک میں کرکٹ اسٹیڈیم کی تعمیر میں دلچسپی نہیں رکھتے، لیکن ہمیں اسلام آباد میں کرکٹ اسٹیڈیم کی تعمیر میں گہری دلچسپی ہے،چیف جسٹس نے ریمارکس دیئے کہ ہم کھیلوں کو سپورٹ کرتے ہیں،کھیل صحتمندانہ سرگرمی ہے، ہم آپ کو اسلام آباد میں کرکٹ اسٹیڈیم کے لیے جگہ لینے میں مدد کریں گے،جسٹس ثاقب نثار نے مزید کہا کہ نیشنل پارک میں متاثرہ سائٹ کو اس کی اصل شکل میں بحال کرائیں گے،جس پر نجم سیٹھی نے کہا کہ پی سی بی ماحول دوستی کے لیے کام کرنے کو تیار ہے، ہم عدالت اور ماحولیاتی ایجنسی کے ساتھ ہیں، کہیں اور جگہ زمین مل گئی تو 3، 4 سال میں اسٹیڈیم بن جائے گا،چیف جسٹس نے اس موقع پر ریمارکس دیئے کہ اگر آپ نے کام کرنا ہے تو ملک میں آرٹ اور کلچر کو فروغ دیں، لیکن یہ نہ ہو کہ آرٹ و کلچر کے نام پر مچھلی اور پکوانوں کی دکانیں بنا کر ماحول خراب کرتے رہیں۔

(جاری ہے)

چیف جسٹس کا مزید کہنا تھا کہ قذافی اسٹیڈیم لاہور کے گرد اتنی دکانیں بن گئی ہیں کہ ان کا دھواں بھی اسٹیڈیم میں آتا ہے، لیکن پی سی بی کے کچھ ملازمین کی شاید وہاں سے روزی روٹی لگی ہے،سماعت کے بعد عدالت عظمی نے سٹیڈیم کی تعمیر روکنے سے متعلق حکم برقرار رکھا اور تجاویز طلب کرتے ہوئے کیس کی سماعت 2 ہفتوں تک کے لیے ملتوی کردی۔واضح رہے کہ ایک سابق بیورو کریٹ روئیداد خان نے شکر پڑیاں میں کرکٹ اسٹیڈیم کی تعمیر کے خلاف سپریم کورٹ میں درخواست دائر کرتے ہوئے مقف اپنایا تھا کہ حکومت شکرپڑیاں میں کرکٹ اسٹیڈیم او،ْر فائیو اسٹار ہوٹل بناناچاہتی ہے جس سے آلودگی میں اضافہ ہوگا۔

سپریم کورٹ نے رواں ہفتے 2 مئی کو اسلام آباد کے علاقے شکر پڑیاں میں کرکٹ اسٹیڈیم کی تعمیر روکتے ہوئے درخت کاٹنے پر پابندی لگادی تھی۔