نارنگ منڈی ‘ٹیوشن نہ پڑھنے پر ماسٹر کا آٹھویں جماعت کے طالبعلم پر تشدد ،آنکھوں کی بینائی زائل ہوگئی

اتوار 6 مئی 2018 18:10

نارنگ منڈی (اُردو پوائنٹ اخبارتازہ ترین - این این آئی۔ 06 مئی2018ء) نواحی گورنمنٹ ایلیمنٹری سکول گلو کی میں ہیڈ ماسٹر نے ٹیوشن نہ پڑھنے پر آٹھویں جماعت کے طالبعلم محمد عبداللہ شفیق کو مار مار کر ادھ موا ء کر دیا اور آنکھوں پر کاری ضرب لگنے سے معصوم طالب علم کی ایک آنکھ کی بینائی مکمل زائل ہو گئی جسے تشویشناک حالت میں واھنڈو کے ہسپتا ل سے لاہور میو ہسپتال ریفر کر دیا گیا ہے ۔

(جاری ہے)

ڈاکٹرز نے بتایا کہ طالبعلم کی آنکھوں کے پردوں کو شدید نقصان پہنچا ہے آپریشن کے بعد بینائی کی صورتِ حال واضح ہوگی تا ہم طالبعلم کو ایمر جنسی میں طبی امداد دی جا رہی ہے والدین نے روتے ہوئے وزیر اعلیٰ پنجاب میاں شہباز شریف سیکر ٹیری ایجوکیشن اور ڈی سی گو جرانوالہ سے مار نہیں پیار کی دھجیاں اڑانے پرسخت نوٹس لینے اور ہیڈ ماسٹر کے خلاف سخت قانونی کار وائی کرنے کا مطالبہ کیا ہے اور کہا ہے کہ طالبعلم کوٹلی مقبرہ سے گلو کی میں تعلیم حاصل کرنے کے لیے آتا تھا اور ہیڈ ماسٹر کئی ماہ سے اسے ٹیوشن کے لیے اپنی اکیڈمی میں آنے کے لیے مجبور کرتا تھا اور انکار پر ہیڈ ماسٹر طیش میں آگیا اور جلاد بن کر طالبعلم پر برس پڑا اور اس قدر وحشیانہ تشدد کیا کہ بچے کا پورا جسم زخمی ہو گیا اور تاحال بازو کام نہیں کر رہے۔