چینی ورکنگ گروپ کے ارکان بیجوں کی ترقی، ڈرپ اریگیشن ، ہارٹی کلچر اورگوشت کی صنعت میں پیش رفت کیلئے اگست میں پاکستان کا دورہ کریں گے

پیر 7 مئی 2018 14:36

اسلام آباد ۔ (اُردو پوائنٹ اخبارتازہ ترین - اے پی پی۔ 07 مئی2018ء) بیجوں کی ترقی، ڈرپ اریگیشن ، ہارٹی کلچر اورگوشت کی صنعت میں پیش رفت کیلئے چین کے ورکنگ گروپ کے ارکان کادورہ پاکستان اگست میں متوقع ہے۔سرکاری ذرائع کے مطابق ورکنگ گروپ کے ارکان پاک چین مشترکہ ورکنگ گروپ برائے زراعت کے تحت پاکستان کا دورہ کریں گے اوراس کا بنیادی مقصد مشترکہ ورکنگ گروپ کے تحت پاکستان میں بیجوں کی ترقی، ڈرپ ایریگیشن ، ہارٹی کلچر اورگوشت کی صنعت میں پیش رفت کا جائزہ لینا ہے۔

(جاری ہے)

واضح رہے کہ وزیرمنصوبہ بندی احسن اقبال کے گزشتہ ماہ دورہ چین کے دوران چینی قیادت سے ملاقانوں میں نیسی پیک لانگ ٹرم پلان کے تحت پاک چین زرعی تعاون کو فروغ دینے کا فیصلہ کیا گیا تھا جس کے نتیجے میں پاکستانی کی زرعی پیداواری صلاحیت میں اضافہ ہوگا۔پاک چین اقتصادی راہداری کے تحت پاکستان کے زرعی شعبے کی ترقی کو ترجیحی حیثیت دی گئی ہے اورتوقع ہے کہ آنیوالے سالوں میں پاکستان میں زراعت کے شعبے میں براہ راست بیرونی سرمایہ کاری کی شرح میں نمایاں اضافہ ہوجائے گا۔