الیکشن کمیشن کا عام انتخابات میں امیدواروں کی جانچ پڑتال کے عمل کو شفاف بنانے کے لئے فیصلہ

نادرا آن لائن سکروٹنی سسٹم کا سافٹ ویئر تیار کرے گا۔ نیب، ایف بی آر، ایف آئی اے، سٹیٹ بینک اور الیکشن کمیشن کے علاوہ ریٹرننگ افسران اس نظام سے منسلک ہو جائیں گے ،ْاجلاس میں فیصلے

پیر 7 مئی 2018 20:42

الیکشن کمیشن کا عام انتخابات میں امیدواروں کی جانچ پڑتال کے عمل کو ..

اسلام آباد (اُردو پوائنٹ اخبارتازہ ترین - این این آئی۔ 07 مئی2018ء) الیکشن کمیشن آف پاکستان نے عام انتخابات میں امیدواروں کی جانچ پڑتال کے عمل کو شفاف بنانے کے لئے فیصلہ کیا ہے کہ نادرا آن لائن سکروٹنی سسٹم کا سافٹ ویئر تیار کرے گا۔ نیب، ایف بی آر، ایف آئی اے، سٹیٹ بینک اور الیکشن کمیشن کے علاوہ ریٹرننگ افسران اس نظام سے منسلک ہو جائیں گے۔

اس سافٹ ویئر کے ذریعے تمام امیدواروں کے کوائف نادا کو فراہم کئے جائیں گے۔ پیر کو الیکشن کمیشن سیکرٹریٹ میں چیف الیکشن کمشنر جسٹس (ر) سردار محمد رضا کی صدارت میں اہم اجلاس منعقد ہوا جس میں الیکشن کمیشن کے ممبران، سیکرٹری الیکشن کمیشن، نادرا، سٹیٹ بینک، ایف بی آر، نیب، پیپکو، سوئی گیس اور ایف آئی اے کے افسران نے شرکت کی۔

(جاری ہے)

اجلاس کا مقصد عام انتخابات 2018ء میں امیدواروں کے کاغذات نامزدگی کی آن لائن جانچ پڑتال کے لئے ایک ایسا نظام تیار کرنا ہے جس کے تحت نیب ایف بی آر، ایف آئی اے، سٹیٹ بینک، الیکشن کمیشن سے لنک ہوں تاکہ امیدواروں سے متعلق ضروری معلومات تمام ریٹرننگ افسران کو مہیا کی جا سکیں۔

اس نظام کا مقصد امیدواروں کی جانچ پڑتال کے عمل کو شفاف بنانا ہے۔ اجلاس میں فیصلہ کیا گیا کہ نادرا آن لائن سکروٹنی سسٹم کا سافٹ ویئر تیار کرے گا۔ اس سافٹ ویئر کی الیکشن کمیشن سے منظوری کے بعد نیب، ایف بی آر، ایف آئی اے، سٹیٹ بینک اور الیکشن کمیشن اس نظام سے منسلک ہو جائیں گے ۔اس سافٹ ویئر کے ذریعے تمام امیدواروں کے کوائف نادرا کو فراہم کئے جائیں گے۔ نادرا امیدواروں سے متعلق معلومات الیکشن کمیشن اور دیگر اداروں کو فراہم کرے گا اور تمام ادارے ضروری کارروائی کے بعد امیدواروں سے متعلق معلومات الیکشن کمیشن کو دیں گے اور الیکشن کمیشن یقینی بنائے گا کہ تمام ریٹرننگ افسران کو جانچ پڑتال کے دوران یہ معلومات دستیاب ہوں۔