دنیا کا سب سے بڑا فلمی میلہ فرانس کے شہر کانز میں سج گیا

کانز (اُردو پوائنٹ اخبارتازہ ترین - این این آئی۔ 08 مئی2018ء) دنیا کا سب سے بڑا فلمی میلہ فرانس کے شہر کانز میںسج گیا۔ اسی سلسلے میں کانز فلم فیسٹیول میں شرکت کیلئے دنیا بھر سے ستاروں کی بڑی تعداد کی آمد کا سلسلہ بھی جاری ہے۔اکترویں سالانہ کانزانٹرنیشنل فلم فیسٹیول کا میلہ ہر سال کی طرح اس سال بھی اپنی تمام تر جگمگاہٹ اور رعنائیوں کے ساتھ بس شروع ہوگیا ہے۔

جیوری ممبران اور اداکاروں کی بڑی تعداد ہوٹل کا رٴْخ کر رہی ہے جبکہ اداکاروں کے ریڈ کارپٹ پر جلوے بکھیرنے شروع کردیئے ہیں۔سب سے منفرد نظر آنے کی کوشش کرتیں اداکارائیں نت نئے دلکش ملبوسات پہن کر ریڈ کارپٹ پر جلوہ گر ہونے کیلئے بے تاب دکھائی دے رہی ہیں۔اس سال بھی دنیا بھر سے سینکڑوں فنکار کانز فلم فیسٹیول میں شریک ہوں گے جبکہ بالی وڈ سے ایشوریہ رائے بچن ، دپیکا پڈوکون اور پاکستانی فنکارہ ماہرہ خان بھی شرکت کریں گی۔

(جاری ہے)

8مئی سے 19مئی تک جاری رہنے والے کانز فلم فیسٹیول میں فلموں کے درمیان کڑے مقابلے کی توقع کی جا رہی ہے جس میں ہر روز کسی نہ کسی فلم کا پریمیئر ہوگا اور اس کی فلم اسٹار کاسٹ اپنے مداحوں کے سامنے ہوگی۔گیارہ دن تک جاری رہنے والے اس فیسٹیول میں اداکاروں، ہدایت کاروں اور موسیقاروں سمیت فلمز سے جڑے دیگر افراد بھی شریک ہوں گے جبکہ بہترین کام کرنے والے فنکاروں کو ایوارڈز سے بھی نوازا جائے گا۔پیرس میں فلم فیسٹیول کے موقع پر سیکورٹی کے سخت انتظامات کئے گئے ہیں تاکہ اداکاروں کے تحفظ کو یقینی بنایا جا سکے۔