صوبہ پنجاب میں مختلف ترقیاتی سکیموں کو مکمل کرنے کیلئے 15 ارب روپے سے زائد کی منظوری دے دی گئی

ْ لاہو ر (اُردو پوائنٹ اخبارتازہ ترین - آئی این پی۔ 08 مئی2018ء) حکومت پنجاب نے رواں مالی سال2017-18 کے دوران صوبائی محکمہ پلاننگ اینڈ ڈویلپمنٹ کی صوبائی ڈویلپمنٹ ورکنگ پارٹی کی63ویںاجلاس میں مختلف سیکٹرز کی6 ترقیاتی سکیموں کو مکمل کرنے کے لیے مجموعی طور پر 15 ارب 13کروڑ 9لاکھ 71 ہزار روپے کی منظوری دی ۔ اجلاس کی صدارت چیئرمین پی اینڈ ڈی محمد جہانزیب خان نے کی جبکہ سیکرٹری پی اینڈ ڈی افتخار علی سہو سمیت صوبائی محکمہ جات کے اعلی افسران ، اسسٹنٹ چیف (کوآرڈینیشن ) پی اینڈ ڈی حافظ محمد اقبال اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔

(جاری ہے)

صوبائی ورکنگ پارٹی کی63ویں اجلاس میںجن6ترقیاتی سکیموں کی منظوری دی گئی ان میں سیالکوٹ میں گورنمنٹ کالج وویمن یونیورسٹی کی بلڈنگ کی تعمیر (ترمیمی) کیلئے 2 ارب 19 کروڑ 92 لاکھ 18 ہزار روپے، پنجاب نان فارمل ایجوکیشن پراجیکٹ (ترمیمی) کیلئے 7 ارب 29 کروڑ 94 لاکھ 83 ہزار روپے ، لاہور میں پنجاب اسمبلی بلڈنگ سیشن ہال کی تزئین و آرائش کیلئے 80 کروڑ 97 لاکھ 42 ہزار روپے، صوبہ پنجاب کے مختلف علاقہ جات میں ڈرینج نیٹ ورک کی بہتری کیلئے 1 ارب 97 کروڑ 76 لاکھ 1 ہزار روپے، ماہوتا ڈیم کی تعمیر کیلئے 2 ارب 44 کروڑ 56 لاکھ 59 ہزار روپے اور سیالکوٹ شہر (NA-110) کے روڈز کی سپیشل تعمیر و مرمت و کشادگی کیلئے 39 کروڑ 92 لاکھ 68 ہزار روپے شامل ہیں۔