سرینا ولیمز کی اٹالین اوپن ٹینس ٹورنامنٹ سے دستبرداری کے بعد فرنچ اوپن میں شرکت بھی مشکوک

جمعرات 10 مئی 2018 16:44

واشنگٹن(اُردو پوائنٹ اخبارتازہ ترین - آن لائن۔ 10 مئی2018ء) شہرہ آفاق امریکن ٹینس سٹار اور 23 مرتبہ کی گرینڈ سلام چیمپئن سرینا ولیمز آئندہ ہفتے شیڈول اٹالین اوپن ٹینس ٹورنامنٹ سے دستبردار ہو گئیں، رواں ماہ کے آخر میں شیڈول سال کے دوسرے گرینڈ سلام ٹورنامنٹ فرنچ اوپن میں شرکت بھی مشکوک ہو گئی۔ اٹالین اوپن 14 سے 20 مئی تک کھیلا جائے گا اور سرینا کو چار مرتبہ چیمپئن ہونے کا اعزاز حاصل ہے۔

(جاری ہے)

سابق عالمی نمبر ایک سرینا ولیمز نے آخری مرتبہ 2016 میں کلے کورٹ ایونٹ میں شرکت کی تھی، انہوں نے گزشتہ ہفتے میڈرڈ اوپن سے دستبرداری اختیار کرتے ہوئے کہا تھا کہ وہ ابھی کلے کورٹ کھیلنے کیلئے تیار نہیں اور شاید اسی وجہ سے انہوں نے اٹالین اوپن میں بھی حصہ نہ لینے کا اعلان کیا۔ واضح رہے کہ سرینا نے رواں سال اب تک صرف دو ٹورنامنٹس میں حصہ لیا، میامی اوپن کے پہلے اور انڈین ویلز کے تیسرے رائونڈ میں انہیں شکستوں کا سامنا کرنا پڑا تھا۔۔