Live Updates

صوبہ پنجاب میںموسم گرما کی تعطیلات 17مئی سے 10اگست تک ہوں گی ‘رانا مشہود احمد خاں

کسی بھی سکول کو تعطیلات کی اکٹھی فیس لینے کی بالکل اجازت نہیں ہو گی،تعطیلات کے دوران کسی بھی سکول میں سمر کیمپ کی اضافی فیس لینے کی اجازت نہیں ہوگی‘صوبائی وزیر سکولز ایجوکیشن

جمعرات 10 مئی 2018 18:20

لاہور(اُردو پوائنٹ اخبارتازہ ترین - این این آئی۔ 10 مئی2018ء) صوبائی وزیرسکول ایجوکیشن رانا مشہو د خاں نے کہا ہے کہ صوبہ بھر کے سکولوں میں موسم گرما کی تعطیلات کا آغاز 17مئی سے ہوجائیگا اور دوبارہ سکول 10اگست کو کھلیں گے، پچھلے دو سالوں سے صوبہ بھر میں یکم جون سے چھٹیوں کا آغاز کیا جا تا تھا تاہم رمضان المبارک کی آمد اور گرمی کی شدت کو دیکھتے ہوئے ہمیں یہ فیصلہ کرنا پڑا کہ اس مرتبہ 17مئی جو کہ ممکنہ طور پر پہلے روز ے کی بھی تاریخ ہوگی اسلئے چھٹیوں کا آغاز اسی تاریخ سے کررہے ہیںتاکہ بچوں کے ساتھ والدین بھی رمضان المبارک کے بابرکت مہینے سے فیض یاب ہوسکیں۔

ان خیالات کااظہار انہوںنے پریس کانفرنس سے خطاب کرتے ہوئے کیا ۔ انہوںنے کہاکہ آج کی تاریخ میں ہی اسکا نوٹیفیکیشن بھی جاری کررے ہیں مزید یہ کہ صوبہ بھر میں کوئی بھی سکول موسم گرما کی چھٹیوں کی اکٹھی فیس نہیں لیگا تاکہ والدین پر اضافی بوجھ نہ ڈالا جائے اور اگر ایسی کوئی بھی شکایت موصول ہوئی تو خلاف ورزی کے مرتکب اداروں کو بھاری جرمانوں کا سامنا کرنا پڑے گا۔

(جاری ہے)

صوبائی وزیر نے کہا کہ سمر کیمپ کے حوالے سے کوئی بھی سکول اضافی فیس لینے کا مجاز نہیں ہوگا اور اس کا بھی باقاعدہ نوٹیفیکیشن جا ری کیا جا رہا ہے۔انہوں نے میڈیا نمائندگان پر زور دیتے ہوئے کہاکہ آپ کے توسط سے یہ بات تمام عوام تک مثبت طریقے سے پہنچانا چاہتے ہیں اور خادم پنجاب کے وژن کو مزید آگے بڑھانا چاہتے ہیں۔انہوں نے مزید کہا کہ کچھ اسکولوں وغیرہ میں امتحانات کا سلسلہ جاری ہے ،اسلئے ان اداروں میں امتحانات ختم ہوتے ہی تعطیلات شروع ہو جائیں گی۔

بعد ازاں میڈیا نمائندگان کے سوالات کے جوابات دیتے ہوئے صوبائی وزیر نے کہا کہ اساتذہ وغیرہ کی ٹرانسفر و پوسٹنگ پر لگی پابندی اٹھالی گئی ہے اور اب 31مئی تک ایجوکیٹرز کو ریلیف دینے کیلئے ٹرانسفرز وغیرہ کا عمل اپنے طے شدہ ضوابط کے مطابق مکمل کردیا جائیگا۔ انہوں نے ایک سوال کے جواب میں کہا کہ انسانی حقوق کی اہمیت کو اجاگر کرنے کیلئے پنجاب حکومت تمام اہم امور پہلے سے ہی نصاب میں شامل کر چکی ہے اور کتابچے بھی جاری ہوچکے ہیں۔ انہوں نے ایک اور جواب میں کہا کہ 2018کا سال شہباز شریف کاا لیکشن جیت کر وزیراعظم بننے کا سال ہے کیونکہ عوام جان چکی ہے کہ پاکستان کو اندھیروں سے روشن مستقبل کی طرف لیجانیوالا لیڈر صرف شہبا ز شریف ہی ہے۔
Live رمضان المبارک سے متعلق تازہ ترین معلومات