پنجاب سروس ٹربیونل نے پی سی ایس سروس میں اگلے عہدوں پر ترقی کے لئے کوٹہ کی غیر مساوی تقسیم کے خلاف دائر درخواست نمٹادی

جمعرات 10 مئی 2018 21:12

لاہور (اُردو پوائنٹ اخبارتازہ ترین - آن لائن۔ 10 مئی2018ء) پنجاب سروس ٹربیونل نے پی سی ایس سروس میں اگلے عہدوں پر ترقی کے لئے کوٹہ کی غیر مساوی تقسیم کے خلاف دائر درخواست نمٹادی،عدالت نے پنجاب سیکرٹریٹ کیڈر سے تعلق رکھنے والے افسران کا کوٹہ اعشاریہ سات فیصد بڑھا دیا۔

(جاری ہے)

پنجاب سروس ٹربیونل کے سربراہ جسٹس ریٹائرڈ شعیب سعید کی سربراہی میں تین رکنی بنچ نے کیس کی سماعت کی،درخواست گزار افسران کے وکیل ملک اویس خالد نے عدالت کو آگاہ کیا کہ اگلے عہدوں پر ترقی کے لئے پنجاب سیکرٹریٹ کیڈر سے تعلق رکھنے والے افسران کا کم کوٹہ رکھا گیا ہے جو کہ امتیازی سلوک اور آئین پاکستان کی سنگین خلاف ورزی ہے،انہوں نے بتایا کہ کوٹہ کی غیر مساوی تقسیم کی بناء پرپنجاب سیکرٹریٹ کیڈر کے افسران ترقی کے لئے نظر انداز ہو جاتے ہیں،انہوں نے بتایا کہ پنجاب مینجمنٹ کیڈرکے افسران کی اگلے عہدوں پر ترقی کے لئے ستر فیصد کوٹہ جبکہ پنجاب سیکرٹریٹ کیڈر کے افسران کا کوٹہ صرف تیس فیصدمقرر ہے،حکومت پنجاب کی جانب سے عدالت کو بتایا گیا کہ کوٹہ کی تقسیم قواعد کے تحت عمل میں آتی ہے،جس پر عدالت نے فریقین کے وکلاء کے دلائل مکمل ہونے کے بعد فیصلہ سنادیا،عدالت نے پنجاب سیکرٹریٹ کیڈر سے تعلق رکھنے والے افسران کا کوٹہ اعشاریہ سات فیصد بڑھاتے ہوئے مجموعی کوٹہ 37 فیصد کر دیا۔