امریکی سفارتکار کا نام ای سی ایل میں ڈالنے سے متعلق 2 ہفتوں میں فیصلہ کرنے کی ہدایت

ملزم کرنل جوزف کو مکمل سفارتی استثنیٰ حاصل نہیں ہے ،ْ اسلام آباد ہائی کورٹ نے محفوظ فیصلہ سنا دیا

جمعہ 11 مئی 2018 16:30

اسلام آباد (اُردو پوائنٹ اخبارتازہ ترین - این این آئی۔ 11 مئی2018ء) اسلام آباد ہائی کورٹ نے امریکی ملٹری اتاشی کرنل جوزف کا نام ای سی ایل میں ڈالنے سے متعلق وزارت داخلہ کو 2 ہفتوں میں فیصلہ کرنے کا حکم دے دیا۔ جمعہ کو اسلام آباد ہائی کورٹ کے جسٹس عامر فاروق نے امریکی ملٹری اتاشی کی گاڑی کی ٹکر سے ہلاک ہونے والے عتیق بیگ کے والد کی درخواست پر محفوظ شدہ فیصلہ سناتے ہوئے کہا کہ ملزم کرنل جوزف کو مکمل سفارتی استثنیٰ حاصل نہیں ہے۔

واضح رہے کہ وزارتِ داخلہ اس سے قبل کرنل جوزف کو بلیک لسٹ قرار دے کر عدالت میں رپورٹ جمع کراچکی ہے۔اس حوالے سے اسلام آباد پولیس نے بھی وزارتِ داخلہ کو ایک خط لکھا تھا جس میں درخواست کی تھی کہ متعلقہ مقدمے کے فیصلے تک کرنل جوزف کو ملک چھوڑنے کی اجازت نہ دی جائے۔

(جاری ہے)

خیال رہے کہ مقتول عتیق بیگ کے والد کی جانب سے اسلام آباد ہائی کورٹ میں درخواست دائر کی گئی تھی جس میں کرنل جوزف کا نام ای سی ایل میں ڈالنے اور انسپکٹر جنرل (آئی جی) اسلام آباد، چیف کمشنر اور ایس ایچ او تھانہ کوہسار کو واقع کی شفاف تحقیقات یقینی بنانے کا حکم دینے کی استدعا کی تھی۔

عتیق بیگ کے والد کی درخواست میں کہا گیا تھا کہ پولیس مقدمے کی ابتدائی تحقیقاتی رپورٹ مکمل کرکے متعلقہ عدالت کے سامنے پیش کرے۔مقتول کے والد نے مطالبہ کیا تھا کہ عدالت شفاف تحقیقات کرکے ملزم کو گرفتار کرے اور بیان قلمبند کرنے کا حکم دے۔