اسلام آباد سپورٹس کمپلیکس میں این پی سی کے ممبران کے بچوںکے مابین تیراکی کے مقابلوں کا افتتاح

جمعہ 11 مئی 2018 23:25

اسلام آباد ۔ (اُردو پوائنٹ اخبارتازہ ترین۔ 11 مئی2018ء) نیشنل پریس کلب اسلام آباد کے زیر اہتمام اسلام آباد سپورٹس کمپلیکس میں این پی سی کے ممبران کے بچوںکے مابین تیراکی کے مقابلوں کا افتتاح کیا گیا ۔ نیشنل پریس کلب اسلام آباد کی جانب سے معزز ممبران کے بچوں کے لئے این پی سی سوئمنگ گالا کا اہتمام سپورٹس کمپلیکس اسلام آباد میں کیا گیا ہے جس کی افتتاحی تقریب اور تیراکی مقابلوں کا آغاز ہو گیا ۔

تقریب سے صدر نیشنل پریس کلب طارق محمود چوہدری نے خطاب کرتے ہوئے کہا کہ ہم صحافیوں کے ساتھ ساتھ ان کے اہل خانہ اور بچوں کو انٹر ٹینمنٹ فراہم کرنے کیلئے کوشاں ہیں اور تیراکی مقابلے اسی کاوش کا ایک حصہ ہیں انہوں نے صحافیوں کے بچوں کی کثیر تعداد میں شرکت پر خوشی کا اظہار کیا ۔

(جاری ہے)

سیکرٹری نیشنل پریس کلب شکیل انجم نے بھی تقریب سے خطاب کیا اور کہا کہ اس طرح کی صحت مند سرگرمیاں مستقبل میں بھی جاری رہیں گی اور ہم صحافیوں اور ان کے بچوں کی فلاح و بہبود کیلئے اپنی صلاحیتیں بروکار لاتے رہیں گے ۔

تقریب میں شریک بچوں نے تیراکی کے مقابلوں میں بڑھ چڑھ کر حصہ لیا ۔اس موقع پر صحافیوں کی کثیر تعداد موجود تھی جنہوں نے تیراکی مقابلے کرانے پر پریس کلب کی قیادت اور سپورٹس کمیٹی کے اراکین کا شکریہ ادا کیا اور اسے انتہائی مستحسن قرار دیا ۔ تقریب میں ڈپٹی ڈائریکٹر پاکستان سپورٹس بورڈ آغا امجد اللہ ، اسسٹنٹ ڈائریکٹر سعید احمد ،صدر نیشنل پریس کلب اسلام آباد طارق محمود چوہدری ، سیکرٹری شکیل انجم، چیئر مین سپورٹس کمیٹی این پی سی ناصر نقوی ، مدثر چوہدری سمیت صحافیوں اور ان کے اہل خانہ کی کثیر تعداد نے شرکت کی۔