پوٹھوہار ریجن میں 32 ہزار ایکڑ اراضی کو قابل کاشت بنادیا گیا

راولپنڈی ۔ (اُردو پوائنٹ اخبارتازہ ترین - اے پی پی۔ 13 مئی2018ء) محکمہ زراعت پنجاب نے پوٹھوہار ریجن میں کسان پیکج کے تحت دو برس میں 32ہزار ایکڑ سے زائد اراضی کو قابل کاشت بنادیا ہے ۔ ڈائریکٹر شعبہ تحفظ اراضیات محکمہ زراعت پنجاب غلام اکبر ملک نے اے پی پی کو بتایاکہ محکمہ زراعت پنجاب خطہ پوٹھوہار میں آبپاشی کے وسائل کی بہتری اور زمینی کٹائو کے روک تھام کے قابل قدر اقدامات کیے جا رہے ہیں تاہم خطہ پوٹھوہار میں سینکڑوں مزید منی ڈیمز کے قیام کی ضرورت ہے کیوںکہ خطہ پوٹھوہار میں بارشی پانی کو ذخیرہ کرنے کے ناکافی وسائل کے باعث سالانہ 3.5ملین ایکڑ فٹ پانی ضائع ہوجاتا ہے اور بڑے پیمانے پر زمینی کٹائو کا سامنا بھی کرنا پڑتا ہے ۔

غلام اکبر ملک نے قومی خبر ایجنسی کو بتایاکہ خطہ پوٹھوہار میں بارشی پانی کو ذخیرہ کرنے ،فصلات کو اپریل تا جون اور اکتوبر تا دسمبر اضافی آبپاشی کی اشد ضرورت محسوس کی گئی جس کے پیش نظر منی ڈیمز کے قیام کا تسلسل جاری ہے ۔

(جاری ہے)

انہوں نے کہاکہ خطہ میں پانی کی آمد زیادہ جبکہ ذخیرہ کرنے کے استعدا د کار کم ہونے کی وجہ سے پانی کا ضیاع ہو رہاہے ۔

غلام اکبر ملک نے مزید بتایا کہ پنجاب حکومت نے گذشتہ دوبرس میں کسان پیکیج کے تحت پوٹھوہار ریجن میں 102 منی ڈیمز، 174 پانی محفوظ کرنے کے لئے تالاب، 39 واٹر ٹینکس، 192 سپل ویز، 198 آئوٹ لٹس، 81 پشتہ جات اور 29 بند بنائے اور ان تمام سکیموں پر 80 فیصد سبسڈی دی گئی۔ اس کے علاوہ رعائتی قیمت پر کاشتکاروں کی ناہموار زمین کو بلڈوزروں کے ذریعے ہموار کر کے قابل کاشت بنا یا گیا۔

انہوں بتایاکہ پانی کے ذخائر کے قیام اور زمینی کٹائو کے روک تھام کے اقدامات کی بدولت کسان پیکیج کے تحت پوٹھوہار ریجن میں مجموعی طور پر 32 ہزار 1 سو 90 ایکڑ رقبہ کو قابل کاشت بنایا گیا ۔ اس سے پہلے بھی شعبہ تحفظ اراضی محکمہ زراعت پنجاب کی طرف سے 1200 سے زائد منی ڈیمز بنائے گئے تھے۔ انہو ں نے کہا کہ منی ڈیمز اور تالابوں کی تعمیر سے موسمیاتی تبدیلیوں پر مثبت اثرات مرتب ہوئے اور ان اقدامات کی بدولت زیر زمین پانی کی سطح بلند ہو نا شروع ہو گئی ہے جبکہ ان علاقوںمیں روزگار کے مواقع بڑھ رہے ہیں اور ماہی پروری اور گلہ بانی کے شعبے کو تقویت مل رہی ہے ۔ یہ اقدامات دیہی ترقی کے لئے بہت بڑی مثبت تبدیلی کی حیثیت رکھتے ہیں۔