پاکستان ہاکی ٹیم کے سابق کپتان منصور احمد کی نماز جنازہ کراچی میں ادا، مقامی قبرستان میں سپرد خاک

نماز جنازہ میں ہاکی سے وابستہ سابق کھلاڑیوں سمیت قومی کرکٹ ٹیم کے سابق کپتان شاہد آفریدی نے شرکت کی

اتوار مئی 18:20

کراچی(اُردو پوائنٹ اخبارتازہ ترین۔ 13 مئی2018ء) پاکستان کو 1994 کا ہاکی ورلڈ کپ جتوانے والے قومی ہیرو منصور احمد کی نماز جنازہ کراچی میں ادا کردی گئی، ہاکی سے وابستہ سابق کھلاڑیوں سمیت قومی کرکٹ ٹیم کے سابق کپتان شاہد آفریدی نے شرکت کی۔ اتوار کو سابق اولمپئن اور قومی ہاکی ٹیم کے سابق کپتان و گول کیپر منصور احمد دل کے عارضے میں مبتلا تھے جو گزشتہ روز خالق حقیقی سے جاملے۔

مرحوم کی نماز جنازہ کراچی کی مسجد میں ادا کی گئی جس میں ہاکی سے وابستہ سابق کھلاڑیوں سمیت قومی کرکٹ ٹیم کے سابق کپتان شاہد آفریدی نے شرکت کی۔ منصور احمد کے انتقال پر سابق ہاکی کپتان سمیع اللہ، اصلاح الدین اور شہباز سینئر سمیت ہاکی سے وابستہ دیگر شخصیات نے افسوس کا اظہار کیا۔سابق اولمپیئن رشید الحسن نے منصور احمد کی وفات پر کہا کہ ان کی وفات سے قوم ایک عظیم کھلاڑی سے محروم ہوگئی ہے۔

(جاری ہے)

یاد رہے کہ 49 سالہ عالمی شہرت یافتہ گول کیپر کا دل صرف 20 فیصد کام کررہا تھا، ان کے دل میں 7 اسٹنٹس ڈالے گئے تھے جب کہ گردوں اور پھیپھڑوں نے بھی کام کرنا چھوڑ دیا تھا۔منصور احمد پاکستان کی جانب سے 338 انٹرنیشنل میچز کھیل چکے ہیں، انہوں نے 1986 سے 2000 کے دوران اپنے کیریئر میں 3 اولمپکس اور کئی ہائی پروفائل ایونٹس میں پاکستان کی نمائندگی کی۔منصور احمد ہی وہ کھلاڑی ہیں، جنہوں نے 24 سال قبل پاکستان کو چوتھی مرتبہ ہاکی کا عالمی چیمپیئن بنایا تھا۔ وہ 1994 کے ہاکی کے ورلڈکپ میں پاکستان کے ہیرو تصور کیے جاتے تھے جب کہ انہیں دنیا کے نمبر ون گول کیپر کا اعزاز بھی حاصل تھا۔