ْماہ صیام میں عوام کو ریلیف کیلئے تمام تیاریاں مکمل کر لی گئیں،چیئرمین پرائس کنٹرول کمیٹی

عوام رمضان بازاروں ،فیئر پرائس شاپس سے معیاری اشیائ کی سستے نرخوں پر خریداری کر سکیں گے‘ میاں عثمان کی زیر صدارت اجلاس

اتوار مئی 18:50

لاہور(اُردو پوائنٹ اخبارتازہ ترین۔ 13 مئی2018ء) چیئرمین پرائس کنٹرول کمیٹی میاں عثمان نے کہا ہے کہ متعلقہ اداروں کی جانب سے رمضان المبارک کے سلسلہ میں تیاریاں حتمی مرحلے میں داخل ہو گئی ہیں،عوام کو رمضان بازاروں اورفیئر پرائس شاپس کے ذریعے معیاری اشیاء کی سستے نرخوں پر فراہمی کیلئے تمام انتظامات مکمل کر لئے گئے ہیں۔۔وزیر اعلیٰ پنجاب میاں محمد شہباز شریف کی ہدایت پر گراں فروشوں اور کم تولنے والوں سے آہنی ہاتھوں سے نمٹا جائے گا۔

گزشتہ روز ان خیالات کا اظہار انہوں نے رمضان المبارک میں گراں فروشوں کیخلاف موثر کارروائیوں اور دیگر انتظامات کے سلسلہ میںمنعقدہ اجلاس کے دوران کیا۔چیئرمین پرائس کنٹرول کمیٹی میاں عثمان نے کہا کہ رمضان المبارک میں عوام کو ریلیف دینے اور ناجائز منافع خوری کی روک تھام کیلئے گزشتہ ایک ماہ سے تیاریاں جاری تھیں جنہیں حتمی شکل دیدی گئی ہے۔

(جاری ہے)

عوام کو ریلیف دینے کیلئے تمام اسٹیک ہولڈرز سے پیشگی مذاکرات کئے گئے اور تمام ایسوسی ایشنزکے عہدیداروں نے حکومت کی کاوشوں میں اپنے بھرپور تعاون کی یقین دہانی کرائی ہے۔ انہوں نے کہا کہ اوپن مارکیٹوں میں گراں فروشی کرنے والوں کیخلاف سخت کارروائی کیلئے حکمت عملی مرتب کر لی گئی ہے۔ایسے عناصر کو پیشگی متنبہ کیا جارہا ہے کہ وہ اپنا قبلہ درست کر لیں اور رمضان المبارک میں عوام کا استحصال کرنے سے باز رہیں۔

انہوںنے کہا کہ رمضان المبارک میں نہ صرف گراں فروشی کرنے والوں بلکہ کم تولنے اور ناقص اشیاء فروخت کرنے والوں کیخلاف بھی سخت کارروائی عمل میں لائی جائیگی۔انہوں نے کہا کہ کمشنر لاہور ڈویڑن اور ڈپٹی کمشنر کی سربراہی میں تمام تیاریوں کو حتمی شکل دیدی گئی ہے اور عوام کی آسانی کیلئے دن رات ایک کر دیں گے۔