جعلی خان کے پی کے عوام کو دھوکہ دے چکے دیگر صوبوں کے عوام ان کے جھانسے میں نہ آئیں،پی پی پی ر ہنماء ہمایوں خان

اتوار مئی 18:50

اسلام آباد(اُردو پوائنٹ اخبارتازہ ترین۔ 13 مئی2018ء) پیپلز پارٹی خیبرپختونخوا کے صدر ہمایوں خان نے کہا ہے کہ جعلی خان کے پی کے عوام کو دھوکہ دے چکے ہیں دیگر صوبوں کے عوام ان کے جھانسے میں نہ آئیں۔ عمران خان کے کراچی کے خطاب پر ردعمل کا اظہار کرتے ہوئے ہمایوں خان نے کہا کہ جب سے پی ٹی آئی کے منحوس سائے کے پی پر پڑے ہیں پختونوں کو زخم ہی زخم ملے۔

انہوں نے کہا کہ اے پی ایس کے شہداء، مشال خان کے قتل کے نشان عمران نیازی کے دامن پر نمایاں ہیں۔ ہمایوں خان نے کہا کہ پی ٹی آئی کی حکومت نے نہ کوئی سکول بنایا، نہ کوئی کالج، نہ کوئی ہسپتال اور نہ کوئی بڑی شاہراہ اس کے باوجود صوبے کو پونے تین سو ارب کا مقروض کر دیا۔ ہمایوں خان نے کہا کہ صوبے میں سینکڑوں کی تعداد میں پرائمری سکول بند کئے گئے ہیں جس کی وجہ سے صوبے کے ایک چوتھائی بچے اسکول جانے سے محروم ہیں۔

(جاری ہے)

انہوں نے کہا کہ یہی حالت محکمہ صحت کی ہے۔ جس کے سارے فنڈ چوری کئے گئے ہیں یہی وجہ ہے کہ ہسپتالوں میں ادویات میسر نہیں ہیں۔ ہمایوں نے خان نے کہا کہ پی ٹی آئی کے عہدیداربھی وزیراعلیٰ خٹک پر کرپشن کے ثبوت لے کر پھر رہے ہیں مگر چونکہ عمران نے احتساب بیورو کے دفاتر تالے لگا دئیے ہیں اس لئے کوئی فریاد سننے کے لئے تیار نہیں۔ ہمایوں خان نے کہا کہ باقی صوبے کا جو حال ہے وہ انتہائی خراب ہے صرف پشاور شہر کی آدھی آبادی پینے کے صاف پانی سے محروم ہے۔ انہوں نے کہا کہ جھوٹ بولنے اور گمراہ کرنے میں عمران نیازی نے گوئبلز یونیورسٹی سے پی ایچ ڈی کی ڈگری لے رکھی ہے۔نورک