وفاقی پولیس اور ہواوے کرکٹ ٹیم کے درمیان ون ڈے میچ اسلام آباد پولیس نے تین وکٹوں سے جیت لیا

اتوار 13 مئی 2018 19:10

اسلام آباد ۔ (اُردو پوائنٹ اخبارتازہ ترین۔ 13 مئی2018ء) وفاقی پولیس اور ہواوے کرکٹ ٹیموں کے درمیان ون ڈے میچ کھیلا گیا جو اسلام آباد پولیس کی ٹیم نے تین وکٹوں سے جیت لیا۔ اسلام آباد پولیس کی ٹیم نے ٹاس جیت کر پہلے بائولنگ کی اور ہواوے کی ٹیم 34 اوورز میں 198 رنز بنا کر آئوٹ ہو گئی۔ ہواوے کی طرف سے فرحان نے 39 رنز، عدنا ن نے 60اور یٰسین نے 25رنز سکور کئے اسلام آباد پولیس کی طرف سے محمد طاہر اے ایس آئی نے بہترین بولنگ کا مظاہرہ کرتے ہوئے 05وکٹیں حاصل کیں جبکہ وحید اور گل حمید نے دو دو وکٹیں لیں۔

جواب میں اسلام آباد پولیس کی ٹیم نے ہدف 25اوور ز میں 6 وکٹوں کے نقصان پر حاصل کر لیا۔ فیصل نے 35رنز،ملک ایوب نے 20،منیب نے 25،حامد نے 24 اور محمد طاہر 18رنز بنا کر ناٹ آئوٹ رہے۔

(جاری ہے)

ہواوے کی طرف سے یاسر نے چار وکٹیں حاصل کیں۔ بہترین آل رائونڈ کارکردگی پر محمد طاہر اے ایس آئی کو مین آف دی میچ کا ایوارڈ دیا گیا۔آئی جی اسلام آباد ڈاکٹر سلطان اعظم تیموری نے اپنے پیغام میں دونوں ٹیموں کو بہترین کھیل پیش کرنے پر مبارکباد دی اور اسلام آباد پولیس کی سپورٹس کمیٹی کو ہدایات کیں کہ سپورٹس ایونٹس کو کامیابی سے جاری رکھا جائے تاکہ پولیس جوانوں کو ڈیوٹیز کے ساتھ ساتھ ایسی صحتمندانہ سرگرمیوں لطف اندوز ہونے کا موقع مل سکے۔