حکومت نے دیہی علاقوں میں 295موبائل سروس یونٹس قائم کر رکھے ہیں، وزارت صحت

اتوار 13 مئی 2018 20:10

اسلام آباد ۔ (اُردو پوائنٹ اخبارتازہ ترین - اے پی پی۔ 13 مئی2018ء) حکومت نے تولیدی صحت اور خاندانی منصوبہ بندی کی خدمات باقاعدہ مہم کی بنیاد پر دیہی علاقوں میں فراہمی کو یقینی بنانے کے لئے 295 موبائل سروس یونٹس قائم کر رکھے ہیں۔ وزارت صحت کے ذرائع نے بتایا کہ یہ مراکز بہبود آبادی پروگرام کے تحت قائم کئے گئے جس کے لئے وفاقی حکومت نے پنجاب ، سندھ، بلوچستان، خیبرپختونخوا، گلگت بلتستان، آزاد جموں و کشمیر اور فاٹا کے علاقوں کے لئے 8.176ارب روپے مختص کئے گئے ہیں۔

(جاری ہے)

رواں مالی سال کے دوران حکومت نے 38دیہی صحت مراکز بھی قائم کئے ہیں جہاں ڈاکٹرز اور پیرامیڈیکل سٹاف کو تربیت فراہم کی جا رہی ہے۔ بجٹ دستاویز میں بھی ظاہر کیا گیا کہ 2782مرد موبلائزرز بھی فیملی ویلفیئر پروگراموں اور مردوں کو آگاہی دینے کیلئے فعال ہیں، وہ خواتین اور لڑکیوں میں صنفی مسابقت کے حوالے سے آگاہی بھی پھیلا رہے ہیں۔ مزید براں خاندانی بہبود کے مراکز کی تعداد 3439تک پہنچ چکی ہے جو خدمات کی فراہمی کے اہم مراکز ہیں جو اس پروگرام کے تحت شہری اور دیہی علاقوں میں قائم ہیں جہاں زچہ کو صحت کی خدمات کے علاوہ معمولی عارضوں کے علاج معالجہ کی سہولیات بھی فراہم کر رہے ہیں۔