انتخابات میں شکست کے بعد لبنانی وزیراعظم سعد الحریری کا عملہ تبدیل

سعدالحریری کے کزن چیف آف اسٹاف نادر الحریری کو بھی عہدے سے ہٹاکر محمد منیمن کوتعینات کردیاگیا

پیر مئی 11:50

بیروت (اُردو پوائنٹ اخبارتازہ ترین۔ 14 مئی2018ء) لبنان کے وزیراعظم سعد الحریری نے حالیہ عام انتخابات میں اپنی جماعت مستقبل تحریک کی شکست کے بعد اپنے چیف آف اسٹاف سمیت عملہ کو تبدیل کردیا ہے۔مستقبل تحریک گذشتہ ہفتے منعقدہ پارلیمانی انتخابات میں ایک تہائی سے زیادہ نشستیں ہار گئی ہے اور اس کے امیدوار صرف 20نشستوں پر کامیاب ہوسکے ہیں ۔2009ء میں منعقدہ عام انتخابات میں مستقبل تحریک نے پارلیمان کی 128 میں سے 33 نشستوں پر کامیابی حاصل کی تھی۔

(جاری ہے)

غیرملکی خبررساں ادارے کے مطابق سعد الحریری نے ایک بیان میں کہاکہ ان کی جماعت بہتر نتیجے کی توقع کررہی تھی لیکن اس نے جس انداز میں مہم چلائی ہے،اس میں کچھ سقم تھے اور اس کے ذمے دار و ں کا تعیّن کیا جائے گا۔سعد الحریری کے دفتر نے ان کے چیف آف اسٹاف نادر الحریری کے استعفے کا اعلان کیا ہے۔ وہ ان کے کزن ہیں ۔ان کی جگہ محمد منیمن کو عارضی طور پر سعد الحریری کا چیف آف اسٹاف مقرر کیا گیا ہے۔عام انتخابات میں شکست کے باوجود سعد الحریری آیندہ حکومت میں بھی وزیراعظم کے مضبوط امیدوار ہیں کیونکہ پارلیمان میں ان کی قیادت میں سٴْنی مسلم بلاک نے سب سے زیادہ نشستیں حاصل کی ہیں۔