وادی نیلم ،ْ نالہ جاگراں کے مقام پر سیاحوں کے ڈوبنے کے واقعہ میں 7 افراد کی لاشیں نکال لی گئیں

جاں بحق ہونے والوں میں ٹپس کالج فیصل آباد کے 3، ساہیوال میڈیکل کالج کا ایک، ٹریکر کلب کے 2 افراد شامل

پیر مئی 15:09

وادی نیلم (اُردو پوائنٹ اخبارتازہ ترین۔ 14 مئی2018ء) وادی نیلم کے علاقے نالہ جاگراں کے مقام پر سیاحوں کے ڈوبنے کے واقعے میں اب تک 7 افراد کی لاشیں نکالی جاچکی ہیں ،ْ لاپتہ 6 افراد کی تلاش کا کام تیز کر دیا گیا ۔ترجمان نیشنل ڈیزاسٹر مینجمنٹ اتھارٹی (این ڈی ایم ای) نے کہاکہ نالہ جاگراں میں ڈوبنے والے ایک اور سیاح کی لاش نکال لی گئی جس کے بعد ڈوب کر جاں بحق ہونے والوں کی تعداد 7 ہوگئی۔

ترجمان کا کہنا ہے کہ جاں بحق ہونے والوں میں ٹپس کالج فیصل آباد کے 3، ساہیوال میڈیکل کالج کا ایک، ٹریکر کلب کے 2 افراد شامل ہیں۔ ترجمان این ڈی ایم اے کے مطابق جاں بحق ایک شخص کی لاش کی شناخت نہیں کی جا سکی ،ْ حادثے میں لاپتہ ہونے والے 6 افراد کی تلاش تیز کر دی گئی جس کیلئے پاکستان آرمی، نیوی، ریسکیو 1122 اور پولیس و دیگر لوگ مصروف عمل ہیں۔

(جاری ہے)

این ڈی ایم اے کے ترجمان کا کہنا ہے کہ حادثے میں زخمی ہونے والے 11 افراد کو آرمی ہیلی کاپٹر کے ذریعے سی ایم ایچ مظفر آباد منتقل کیا گیا تھا۔ پل گرنے کے واقعہ پر وزیراعظم آزاد کشمیر راجا فاروق حیدر کی جانب سے مظفرآباد میں کنٹرول روم قائم کیا گیا اور متاثرہ خاندانوں کو ہدایت کی گئی ہے کہ وہ کنٹرول روم کے فون نمبر 0582220097 پر رابطہ کریں۔دوسری جانب لاہور میں پراونشل ڈیزاسٹر مینجمنٹ نے انفارمیشن سیل قائم کر دیا اور کہا گیا کہ لواحقین معلومات کے لیے اس نمبر پر 99204404-042 رابطہ کرسکتے ہیں۔