آزاد کشمیر میں مسلم لیگ (ن) حکومت عوام الناس کو بلا تخصیص بنیادی سہولتوں کی فراہمی کو یقینی بنا رہی ہے ،ْچوہدری محمد اسحق

پیر 14 مئی 2018 15:20

مظفرآباد(اُردو پوائنٹ اخبارتازہ ترین - این این آئی۔ 14 مئی2018ء) آزاد کشمیر حکومت کے وزیر جیلخانہ جات چوہدری محمد اسحق نے کہا ہے کہ آزاد کشمیر میں مسلم لیگ (ن) کی موجودہ حکومت عوام الناس کو بلا تخصیص بنیادی سہولتوں کی فراہمی کو یقینی بنا رہی ہے کہ اس ضمن میں شہری زندگی کو بہتر بنانے کے لئے اقدامات کیے جارہے ہیں ۔

(جاری ہے)

شہریوں کو صحت عامہ ،تعلیم ، ذرائع رسل و رسائل ، مواصلات اور پینے کے صاف پانی کی سہولیات بہم پہنچانے کے لیے ترجیحی بنیادوں پر منصوبہ سازی کی جارہی ہے ۔

ان خیالات کا اظہار انہوں نے محکمانہ افسران سے ملاقات کے دوران کیا ۔چوہدری محمد اسحق نے آزاد کشمیر میں امن عامہ کی صورتحال کو تسلی بخش قرار دیااور کہا کہ آزاد کشمیر کی جیلوں میں بھی قیدیوں کو سہولیات کی فراہمی کے لیے اقدامات کیے جارہے ہیں ۔ انہوں نے مزید کہا کہ آزاد کشمیر میں سرکاری ملازمتوں میں میرٹ کی پالیسی پر عملدرآمد کیا جارہا ہے اور گڈگورننس کے قیام کو یقینی بنایا جارہاہے ۔