حکومت شہریوں کو صحت عامہ ،تعلیم اور پینے کے صاف پانی کی فراہمی کے لئے منصوبہ سازی کررہی ہے ، وزیر جیلخانہ جات چوہدری محمد اسحق

پیر 14 مئی 2018 16:28

مظفرآباد ۔ (اُردو پوائنٹ اخبارتازہ ترین - اے پی پی۔ 14 مئی2018ء) آزاد کشمیر حکومت کے وزیر جیلخانہ جات چوہدری محمد اسحق نے کہا ہے کہ آزاد کشمیر میں مسلم لیگ ن کی حکومت عوام الناس کو بنیادی سہولتوں کی فراہمی کو یقینی بنانے کے لئے اقدامات کررہی ہے ۔ شہریوں کو صحت عامہ ،تعلیم ، ذرائع رسل و رسائل ، مواصلات اور پینے کے صاف پانی کی سہولیات بہم پہنچانے کے لیے ترجیحی بنیادوں پر منصوبہ سازی کی جارہی ہے ۔

(جاری ہے)

ان خیالات کا اظہار انہوں نے محکمانہ افسران سے ملاقات کے دوران کیا ۔چوہدری محمد اسحق نے آزاد کشمیر میں امن عامہ کی صورتحال کو تسلی بخش قرار دیااور کہا کہ آزاد کشمیر کی جیلوں میں بھی قیدیوں کو سہولیات کی فراہمی کے لیے اقدامات کیے جارہے ہیں ۔ انہوں نے مزید کہا کہ آزاد کشمیر میں سرکاری ملازمتوں میں میرٹ کی پالیسی پر عملدرآمد کیا جارہا ہے اور گڈگورننس کے قیام کو یقینی بنایا جارہاہے ۔