کیا جوہری ڈیل بچ سکتی ہی ایرانی وزیرخارجہ کی چین کے بعد روس آمد

ڈیل کے مستقبل کے واضح ڈیزائن کے حوالے سے خاصے پرامید ہیں،چینی ہم منصب سے ملاقات کے بعدگفتگو

منگل 15 مئی 2018 12:00

تہران(اُردو پوائنٹ اخبارتازہ ترین - این این آئی۔ 15 مئی2018ء) ایرانی وزیرخارجہ جواد ظریف جوہری ڈیل سے امریکا کے اخراج کے بعد غیرملکی دورے پر ہیں۔اپنے چینی ہم منصب سے ملاقات کے بعد وہ ماسکو پہنچ گئے جب کہ روس کے بعد ان کی اگلی منزل برسلز ہے۔

(جاری ہے)

غیرملکی خبررساں ادارے کے مطابق محمد جواد ظریف نے بیجنگ میں اپنے چینی ہم منصب سے ملاقات کے بعد اس امید کا اظہار کیا کہ جوہری معاہدے کی بقا کے لیے کوئی حکمت عملی تیار کر لی جائے گی۔

بیجنگ میں جواد ظریف نے کہا کہ وہ اس ڈیل کے مستقبل کے واضح ڈیزائن کے حوالے سے خاصے پرامید ہیں۔روسی صدر ولادمیر پوٹن نے بھی اس حوالے سے جرمن چانسلر میرکل اور ترک صدر رجب طیب ایردوآن سے گفت گو کی ۔ انہوں نے امریکی فیصلے پر شدید تشویش کا اظہار بھی کیا۔ صدر ٹرمپ کے اس فیصلے پر یورپی یونین بھی برہم ہے جب کہ چین اور روس کی جانب سے بھی اس پر تنقید کی جا رہی ہے۔