آصف زرداری نے اسرائیلی فوج کے ہاتھوں فلسطینیوں کے قتل عام کو وحشیانہ عمل قرار د یدیا ، بربریت کی شدید مذمت

منگل 15 مئی 2018 23:31

اسلام آباد(اُردو پوائنٹ اخبارتازہ ترین - آئی این پی۔ 15 مئی2018ء) سابق صدر پاکستان اور پاکستان پیپلزپارٹی پارلیمنٹیرینز کے صدر آصف علی زرداری نے اسرائیلی فوج کے ہاتھوں فلسطینیوں کے قتل عام کو وحشیانہ عمل قرار دیتے ہوئے اسرائیلی فوج کی بربریت کی شدید مذمت کی ہے۔ منگل کو ایک بیان میں آصف علی زرداری نے کہا کہ فلسطینی عوام اور بچوں کی شہادت انتہائی دردناک ہے۔

دنیا کی مہذب قومیں مظلوم فلسطینی عوام کا ساتھ دیں۔

(جاری ہے)

سابق صدر نے کہا کہ اقوام متحدہ اسرائیلی بربریت کا نوٹس لے اور اپنے چارٹر پر سختی سے عمل کرے۔ انہوں نے کہا کہ سلامتی کونسل فلسطینی قوم کی خون ریزی روکنے میں اپنا کردار ادا کرے۔ آصف علی زرداری نے کہا کہ شہید قائدعوام ذوالفقار علی بھٹو اور محترمہ بینظیر بھٹو شہید فلسطین کے لئے بااثر آواز تھے۔ انہوں نے عالمی سطح پر فلسطین کے حق میں آواز بلند کی۔ آصف علی زرداری نے کہا کہ پاکستان کی عوام کا دل فلسطین کے عوام کے دھڑکتا ہے۔ فلسطینی عوام اور بچوں کے قتل عام پر پاکستان کی عوام غمگین اور رنجیدہ ہے۔