موٹروے،میٹروبس کے کامیاب منصوبے کے بعد اورنج ٹرین مسلم لیگ(ن) کی حکومت کی طرف سے عوام کیلئے تحفہ ہے ‘چوہدری سجاد احمد خاں

مسلم لیگ( ن) نے ہمیشہ کارکنوں کو عزت دی ہے آئندہ عام انتخابات میں عوام ووٹ کی طاقت سے ایک بار پھر مسلم لیگ ن پر ہی اپنے اعتماد کا اظہار کریں گے

بدھ 16 مئی 2018 15:11

کامونکی(اُردو پوائنٹ اخبارتازہ ترین - این این آئی۔ 16 مئی2018ء) موٹروے،میٹروبس کے کامیاب منصوبے کے بعد اورنج ٹرین مسلم لیگ(ن) کی حکومت کی طرف سے عوام کیلئے تحفہ ہے ،ن لیگ نے اپنے دور اقتدار میں عوام کی فلاح و بہبود کیلئے عملی اقدامات کئے۔ان خیالات کا اظہار چیئرمین میونسپل کمیٹی کامونکے چودھری سجاد احمد خاں نے اپنے بیان میں کیا۔

(جاری ہے)

انہوں نے کہاکہ مسلم لیگ ن کے کھوکھلے اور چلے ہوئے کارتوس تحریک انصاف میں شامل ہو رہے ہیں مسلم لیگ ن نے ہمیشہ کارکنوں کو عزت دی ہے آئندہ عام انتخابات میں عوام ووٹ کی طاقت سے ایک بار پھر مسلم لیگ ن پر ہی اپنے اعتماد کا اظہار کریں گے کیونکہ مسلم لیگ ن کی عوام دوست پالیسیوں اور ملکی تعمیر وترقی اور عوام کی فلاح وبہبود کے لیے بھر پور اقدامات کیے ہیں جنہیں عوام کبھی بھی فراموش نہیں کر سکتے۔

انہوں نے کہاکہ اگر مخالفین موجودہ حکمرانوں کو اپنی مرضی سے کام کرنے دیتے تو آج پاکستان کا نقشہ کچھ اور ہوتا تمام تر مخالفت کے باوجود میاں برادران نے ملکی تعمیر وترقی کے کام رکنے نہیں دیئے اور ہر وہ منصوبہ شروع کیا جس سے عوام کو زیادہ سے زیادہ ریلیف مل سکے۔