وفاقی حکومت نے عصمت اللہ جونیجو تشدد کیس میں عمران خان کی بریت کا فیصلہ ہائیکورٹ میں چیلنج کردیا

بدھ 16 مئی 2018 17:26

اسلام آباد (اُردو پوائنٹ اخبارتازہ ترین - این این آئی۔ 16 مئی2018ء) وفاقی حکومت نے عصمت اللہ جونیجو تشدد کیس میں عمران خان کی بریت کا فیصلہ ہائیکورٹ میں چیلنج کردیا ہے۔بدھ کو ایڈووکیٹ جنرل کی جانب سے اسلام آباد ہائیکورٹ میں 2014 کے دھرنے کے دوران ایس ایس پی عصمت اللہ جونیجو پر تشدد سے متعلق مقدمے میں انسداد دہشت گردی عدالت کے فیصلے کے خلاف اپیل دائر کی گئی ہے۔

(جاری ہے)

درخواست میں موقف اختیار کیا گیا کہ عمران خان کو ایف آئی آر میں خاص کردار کے ساتھ ملزم نامزد کیا گیا ہے، عمران خان کا جرم ثابت کرنے کے لیے شواہد ریکارڈ پر موجود ہیں ،ْانسداد دہشت گردی عدالت کا فیصلہ قانون سے مطابقت نہیں رکھتا، اس لئے ہائی کورٹ انسداد دہشت گردی عدالت کے فیصلے کو کالعدم قرار دے کر ملزم کے خلاف ٹرائل چلانے کا حکم دے۔واضح رہے کہ اسلام آباد کی انسداد دہشت گردی عدالت نے 4 مئی کو ایس ایس پی تشدد کیس میں عمران خان کو بری کیا تھا۔