مقبوضہ بیت المقدس؛اسرائیلی فورسز کی درندگی پھر شروع،صورتحال کشیدہ

جمعرات مئی 15:24

مقبوضہ بیت القدس(اُردو پوائنٹ اخبارتازہ ترین۔ 17 مئی2018ء) اسرائیلی فوج نے غزہ میں ایک بار پھر فضائی حملوں کا آغاز کردیا ہے،جس میں حماس کے ٹھکانوں کو نشانہ بنایا گیا۔غیر ملکی خبر رساں ادارے کے مطابق اسرائیلی فوج نے غزہ میں ایک بار پھر فضائی حملوں کا آغاز کردیا ہے جس میں فلسطینی تنظیم حماس کے ٹھکانوں کو نشانا بنایا گیا،تاہم حملے میں ابھی تک کسی جانی نقصان کی کوئی اطلاع نہیں ملی۔

اسرائیلی فوج کی جانب سے جاری بیان میں کہا گیا کہ غزہ کے علاقے سے فائرنگ کی گئی جس میں اسرائیلی فوجیوں اور عمارت کو نشانہ بنایا گیا،جس کے جواب میں حماس کیخلاف کارروائی کی جارہی ہے۔دوسری جانب فلسطین نے ہنگری، رومانیہ، آسٹریا اور چیک ری پبلک میں تعینات اپنے سفیروں کو مشاورت کے لیے واپس بلا لیا ہے جبکہ گزشتہ روز امریکا کی جانب سے سفارتخانہ مقبوضہ بیت المقدس منتقل کرنے کے بعد ترکی نے اپنا سفیر فوری طور پر واپس بلاتے ہوئے اپنے ملک سے اسرائیلی سفارت کار کو چلے جانے کا حکم دیدیا۔

(جاری ہے)

واضح رہے کہ امریکا کے سفارتخانے کی تل ابیب سے یروشلم (مقبوضہ بیت المقدس) منتقلی کے موقع پر غزہ میں حالات انتہائی کشیدہ ہیں،اسرائیلی فوج نے مظاہرین کیخلاف طاقت کا وحشیانہ استعمال کرتے ہوئے 58 فلسطینیوں کو شہید کردیا جبکہ آنسو گیس اور فائرنگ کے نتیجے میں 2700 افراد زخمی ہوگئے تھے۔