روزہ دار تیار ہو جائیں!۔۔۔۔محکمہ موسمیات نے الرٹ جاری کردیا

جمعہ 18 مئی 2018 16:30

کراچی ۔ (اُردو پوائنٹ اخبارتازہ ترین - اے پی پی۔ 18 مئی2018ء) محکمہ موسمیات نے آئندہ 6 روز تک کراچی میں شدید گرمی کی پیش گوئی کی ہے اور شہر میں ہیٹ ویو ایڈوائزری جاری بھی کردی۔محکمہ موسمیات کے مطابق کراچی میں سمندری ہوائیں منقطع ہونے کا امکان ہے اور ہفتہ کودرجہ حرارت 40 سے 43 ڈگری سینٹی گریڈ تک جاسکتا ہے۔جمعہ کی دوپہر ساڑھے 12 بجے کراچی کا درجہ حرارت 37 ڈگری سینٹی گریڈ ریکارڈ کیاگیا جب کہ گرمی کی شدت (ہیٹ انڈیکس)40 ڈگری محسوس کی جارہی ہے۔

دن گزرنے کے ساتھ درجہ حرارت میں اضافے کا امکان ہے۔

(جاری ہے)

اس حوالے سے محکمہ موسمیات نے کراچی میں ہیٹ ویو ایڈوائزری جاری کردی جب کہ ہیٹ ویو 6 دن جاری رہنے کا امکان ہے۔محکمہ موسمیات نے کہا ہے کہ تمام اضلاع کے ڈپٹی کمشنرز کو ہیٹ اسٹروک سے بچنے کے انتظامات کی ہدایت کردی گئی ہے اور کراچی انتظامیہ، کے الیکٹرک، پی ڈی ایم اے اور دیگر اداروں کو ایڈوائزری بھیج دی گئی ہے، متعلقہ ادارے پانی اور بجلی کی فراہمی یقینی بنائیں۔ترجمان وزیراعلی ہائوس کے مطابق وزیراعلی سندھ سید مراد علی شاہ نے سیکرٹری ہیلتھ اور کمشنرکو فون کرکے موبائل اسپتال سروس کو متحرک کرنے کی ہدایت کی ہے اور ساتھ ہی انہوں نے ہدایت دی کہ ہیٹ اسٹروک سینٹر پر ادویات اور ڈاکٹرز کی موجودگی یقینی بنائی جائے۔