سندھ ہائی کورٹ ، پاکستان پوسٹ آفس ورکرز سوسائٹی میں کروڑوں کرپشن ریفرنس میں گرفتار ملزم کی میڈیکل بورڈ بنانے کی درخواست پر سینٹرل جیل حکام کو شو کازنوٹس جاری

جمعہ 18 مئی 2018 18:33

کراچی(اُردو پوائنٹ اخبارتازہ ترین - آن لائن۔ 18 مئی2018ء) سندھ ہائی کورٹ نے پاکستان پوسٹ آفس ورکرز سوسائٹی میں کروڑوں روپے کرپشن ریفرنس میں گرفتار ملزم حاجی محمد اسماعیل کی جانب سے میڈیکل بورڈ بنانے کے لئے دائر درخواست پر سینٹرل جیل کے حکام کو شو کازنوٹس جاری کردیا۔سندھ ہائی کورٹ میں پاکستان پوسٹ آفس ورکرز سوسائٹی میں کروڑوں روپے کرپشن ریفرنس میں گرفتار ملزم حاجی محمد اسماعیل کی جانب سے میڈیکل بورڈ بنانے کے لئے دائر درخواست پر سماعت ہوئی۔

عدالت میں جیل حکام ملزم کی صحت کے حوالے سے رپورٹ پیش نہ کرسکے۔

(جاری ہے)

عدالت رپورٹ پیش نہ کرنے پر سینٹرل جیل کے حکام پر سخت برہمی کا اظہار کرتے ہوئے شوکاز نوٹس جاری کیا۔عدالت میں وکیل صفائی کا کہنا تھا کہ انکا موکل حاجی محمد اسماعیل کینسر کے مرض میں مبتلا ہے اور انکے موکل کا کوئی بینک اکاؤنٹ بھی نہیں ہے۔ لہذا انکی ضمانت منظور کی جائے۔اس موقع پر جسٹس اقبال کلہوڑو نے ریمارکس دیئے کہ ملزم کی ضمانت کا فیصلہ میڈیکل بورڈ کی رپورٹ آنے پر ہی کیا جائے گا۔بعد ازاں عدالت نے معاملے پر سماعت 30 مئی تک ملتوی کردی۔ واضح رہے کہ ملزم کے خلاف پاکستان پوسٹ آفس سوسائٹی کے نام پر کروڑوں روپے کرپشن کرنے سے متعلق احتساب عدالت میں ریفرنس زیر سماعت ہے۔