آئندہ انتخابات میں استحصالی قوتوں اور غاصبوں کی باقیات کو شکست دینے کیلئے پارٹی کے کارکن میدان میں نکل آئیں جیسے ہی پارٹی نامزد امیدواروں کا اعلان کرے ان کی طاقت بن کر انتخابات جیتنے کے لئے عوام سے قریبی رابطہ رکھیں

پاکستان پیپلزپارٹی کے سیکریٹری جنرل سید نیر حسین بخاری کا کارکنوں سے گفتگو

ہفتہ 19 مئی 2018 21:56

اسلام آباد(اُردو پوائنٹ اخبارتازہ ترین - آئی این پی۔ 19 مئی2018ء) پاکستان پیپلزپارٹی کے سیکریٹری جنرل سید نیر حسین بخاری نے کہا ہے کہ آئندہ انتخابات میں استحصالی قوتوں اور غاصبوں کی باقیات کو شکست دینے کیلئے پارٹی کے کارکن میدان میں نکل آئیں جیسے ہی پارٹی نامزد امیدواروں کا اعلان کرے ان کی طاقت بن کر انتخابات جیتنے کے لئے عوام سے قریبی رابطہ رکھیں۔

ہفتہ کو عہدیداروں اور کارکنوں سے گفتگو کرتے ہوئے پارٹی کے مرکزی سیکریٹری جنرل نے نیر حسین بخاری نے کہا کہ عمران نیازی کا سو دن کا پلان عوام کو دھوکہ دینے کا پلان ہے۔

(جاری ہے)

عمران اپنے انتخابی حلقے میں پانچ بار بھی نہیں گئے اور اپنے ووٹروں کو پارلیمنٹ میں نمائندگی سے محروم رکھا اس لئے عمران نیازی کو پتہ ہی نہیں کہ عوام کے مسائل کیا ہیں۔

نیر بخاری نے کہا کہ عمران نیازی نے پختونخوا کے عوام کا بھی استحصال کیا جب بھی صوبے کے عوام کوئی مشکل پیش آئی تو وہ ان کی ہمدرد ی کے لئے جانے سے بھی کتراتے رہے۔ انہوں نے کہا کہ پی ٹی آئی اور ن لیگ میں کوئی فرق نہیں۔ نواز اور عمران دونوں استحصالی قوتوں کی پیداوار ہیں۔ نیر بخاری نے پارٹی عہدیداروں پر زور دیا کہ وہ چیئرمین بلاول بھٹو زرداری کے سفیر بن کر عوام تک ان کا پیغام پہنچائیں۔