روہنگیا مسلمان محفوظ زون خالی کریں، ورنہ مقدمے کیلئے تیار ہوجائیں،میانمارفورسز

میانمار فوج نے دوبارہ لاؤڈ اسپیکر کے ذریعے اعلانات شروع کردیئے ،رہنماء روہنگیا کمیٹی کی گفتگو

پیر مئی 13:25

ینگون(اُردو پوائنٹ اخبارتازہ ترین۔ 21 مئی2018ء) میانمار سیکیورٹی فورسز نے بنگلہ دیش اور میانمار کے درمیان ساحلی پٹی (بفرزون) پر پناہ گزین روہنگیا مسلمانوں کو فوراً جگہ خالی کرنے کا حکم دے دیا۔فرانسیسی خبررساں ادارے کے مطابق پناہ گزینوں نے بتایا کہ میانمار فوج نے دوبارہ لاؤڈ اسپیکر کے ذریعے اعلانات شروع کردیئے ۔واضح رہے کہ میانمار فوج کے قتل و غارت سے بچ کر 6 ہزار پناہ گزین بنگلہ دیش اور میانمار کی درمیان ساحلی پٹی پر آباد ہیں۔

اس حوالے سے بتایا گیا کہ تقریباً 7 لاکھ روہنگیا مسلمان میانمار فوج کے ظلم و ستم سے بچنے کے لیے بنگہ دیش ہجرت کرنے پر مجبور ہوئے جبکہ چند ہزار کی تعداد نے دونوں ممالک کی سرحدوں کے درمیان بفرزون میں رہنے پر اکتفا کیا۔اس سے قبل فروری میں میانمار نے آمادگی ظاہر کی تھی کہ وہ لاؤڈ اسپیکر کے ذریعے بفرزون میں موجود روہنگیا مسلمانوں کو بنگلہ دیش جانے پر مجبور نہیں کرے گا۔

(جاری ہے)

اس ضمن میں میانمار فوج نے اپنے چند اہلکاروں کو مذکورہ جگہ سے واپس بلایا تھا تاہم رواں ہفتے دوبارہ لاؤڈ اسپیکر پر اعلانات کا سسلسلہ شروع ہو گیا۔۔روہنگیا کمیٹی کے رہنما نے بتایا کہ میانمار فوج کے اعلانات سے بفرزون میں مقیم پناہ گزینوں میں سخت تشویش پھیل گئی ہے،محمد عارف نامی شخص نے بتایا کہ میانمار فوجیوں نے گزشتہ روز متعدد مرتبہ اعلان کیا اور اگلی صبح بھی اسی پیغام کو دوہرایا جس کی وجہ سے کیمپ میں افراتفری پھیل گئی ہے اور لوگ بہت پریشان ہیں۔

میانمار فوج کی جانب سے جاری اعلانات میں کہا جا رہا ہے کہ میانمار کا یہ علاقہ فوراً خالی کردو ورنہ مقدمے کا سامنے کرنے کے لیے تیار ہو جاؤ۔کیمپ میں رہائش پذیر دل محمد نے کہا کہ ہم میانمار کے شہری ہیں، وہ ہمارے آباؤ اجداد کی زمین ہے اور ہمیں یہاں رہنے کا پورا حق ہے اور ہم یہاں سے نقل مکانی کرکے کیوں دوسری جگہ جائیں۔اعلانات میں روہنگیا مسلمانوں کو بنگالی کہہ کر مخاطب کیا جارہا ہے، میانمار کی قوم پرست بدھ مت اکثریت روہنگیا کو ‘بنگالی’ قرار دیتے ہوئے انہیں بنگہ دیش کا شہری تصور کرتے ہیں۔

متعلقہ عنوان :