ٹیکساس اسکول فائرنگ میں جاں بحق پاکستانی طالبہ کی میت کل پاکستان پہنچے گی

سبیکا کی نماز جنازہ میں پاکستانی کمیونٹی اور مقامی حکام نے بڑی تعداد میں شرکت کی

پیر مئی 13:45

ٹیکساس اسکول فائرنگ میں جاں بحق پاکستانی طالبہ کی میت کل پاکستان پہنچے ..
ہوسٹن(اُردو پوائنٹ اخبارتازہ ترین۔ 21 مئی2018ء) امریکی ریاست ٹیکساس کے ایک ہائی اسکول میں ساتھی طالب علم کی فائرنگ سے جاں بحق ہونے والی پاکستانی طالبہ سبیکا عزیز شیخ کی میت نجی ایئرلائن کی پرواز کے ذریعے کل منگل کو وطن پہنچے گی۔سبیکا کی میت امریکا سے کراچی لانے والی پرواز خراب موسم کے باعث تاخیر کا شکار ہوئی۔امریکا سے سبیکا کی میت لانے والی پرواز براستہ استنبول کراچی پہنچے گی۔

طالبہ کی میت وطن واپس لانے کے سلسلے میں تمام اخراجات پاکستانی قونصل خانہ ادا کر رہا ہے ،ْمیت کے ہمراہ سبیکا کی کزن شہیرا بھی ہوں گی۔اس سے قبل سبیکا عزیز کی نماز جنازہ ہوسٹن میں ادا کردی گئی۔سبیکا شیخ کی نماز جنازہ ہوسٹن کے علاقے شوگر لینڈ کی مسجد صابرین میں نماز ظہر کے بعد ادا کی گئی، جس میں پاکستانی کمیونٹی اور مقامی حکام نے بڑی تعداد میں شرکت کی۔

(جاری ہے)

اس موقع پر دعائیہ تقریب میں میئر ہوسٹن سلویسٹر ٹنر، رکن کانگریس آل گرین، ٹیکساس سے رکن کانگرس شیلا جیکسن، پاکستانی قونصل جنرل عائشہ فاروقی سمیت خواتین کی بھی بڑی تعدادشریک ہوئی۔سبیکا کی نماز جنازہ کے موقع پر مسجد حمزہ کے سامنے گن کنٹرول کے خلاف مظاہرہ بھی کیا گیا۔میئر ہوسٹن نے اس حوالے سے اپنے ٹوئٹر پیغام میں کہا کہ سبیکا ایک شیخ فیملی کی بچی تھی لیکن وہ ہماری بھی بچی تھی، بالکل ان بچوں کی طرح جو اس واقعے میں اپنی جان سے ہاتھ دھو بیٹھے۔

انہوں نے نماز جنازہ میں شرکت کی دعوت دینے پر پاکستانی قونصل جنرل عائشہ فاروقی کا بھی شکریہ ادا کیا۔پاکستانی قونصل جنرل عائشہ فاروقی نے بتایا کہ سبیکا کی میت منگل کی صبح کراچی پہنچے گی۔۔جاں بحق طالبہ کی کزن شہیرا نے بتایا کہ سبیکا کی والدہ سکتے کی کیفیت میں ہیں ،ْ ہم شاید اس صدمے سے ساری زندگی نہ نکل پائیں۔