تحریک انصاف کا پہلے 100 دنوں کا پروگرام قابل عمل ہی نہیں ،ْرانا محمد افضل

پیر مئی 22:20

اسلام آباد (اُردو پوائنٹ اخبارتازہ ترین۔ 21 مئی2018ء) وزیر مملکت برائے خزانہ رانا محمد افضل نے کہا ہے کہ پاکستان تحریک انصاف کا پہلے 100 دنوں کا پروگرام قابل عمل ہی نہیں۔ ایک انٹرویومیں انہوں نے کہا کہ پی ٹی آئی اور اس کی قیادت گزشتہ 5 سالوں سے مسلسل لوگوں کے ساتھ جھوٹ بول رہی ہے اور وہ صرف دوسروں پر الزامات لگانے کی سیاست پر یقین رکھتے ہیں۔

انہوں نے کہا کہ پاکستان تحریک انصاف خیبرپختونخوا میں مکمل حکومت سے لطف اندوز ہو رہی ہے لیکن اس کے باوجود وہ وہاں عوامی فلاح و بہبود کا کوئی ایک بھی بڑا منصوبہ متعارف نہیں کرا سکی جس کی وجہ سے لوگ پی ٹی آئی کی سیاست سے بری طرح مایوس ہو چکے ہیں۔ وزیر مملکت کا کہنا تھا کہ پاکستان تحریک انصاف نے دعوٰی کیا تھا کہ وہ اپنے حکومتی صوبے خیبرپختونخوا میں ایک ارب درخت لگائے گی لیکن وہ اس ضمن میں بھی بری طرح ناکام ہو چکے ہیں۔

(جاری ہے)

انہوں نے کہا کہ اقوام متحدہ کے ادارے (یو این ڈی پی) کی ایک حالیہ رپورٹ کے مطابق خیبرپختونخوا ترقیاتی کاموں کے حوالے سے ملک کے دیگر صوبوں سے بہت زیادہ پیچھے ہے۔ انہوں نے کہا کہ پی ٹی آئی کی اتحادی جماعت جماعت اسلامی نے بھی اعتراف کیا ہے کہ پاکستان تحریک انصاف نے صوبہ خیبرپختونخوا کی ترقی و خوشحالی کے لیے کچھ بھی نہیں کیا جبکہ دعوٰی تو وہ ملک میں بڑی تبدیلی کا کرتے ہیں۔ رانا محمد افضل کا کہنا تھا کہ پاکستان مسلم لیگ (ن) ان نقاط پر پہلے ہی سے عملدرآمد کر رہی ہے جو عمران خان نے دئیے ہیں۔