لاہور،سیشن کورٹ میں پیشی پر آئے ملزمان آپس میں گتھم گتھا ہو گئے

منگل 22 مئی 2018 15:04

لاہور۔22 مئی(اُردو پوائنٹ اخبارتازہ ترین - اے پی پی۔ 22 مئی2018ء) لاہور کے سیشن کورٹ میں پیشی پر آئے ملزمان ہنگامہ آرائی کرتے ہوئے آپس میں گتھم گتھا ہو گئے، لاہور کی سیشن عدالت میں منگل کو پیشی پر آئے ملزم اور مدعی پارٹی آپس میں الجھ پڑے اور گتھم گتھا ہوگئے،دونوں پارٹیاں ایک دوسرے پر لاتوں، گھونسوں اور تھپڑوں کا آزادانہ استعمال کرتی رہیں۔

(جاری ہے)

دونوں پارٹیوں کے تصادم سے سیشن کورٹ میدان جنگ کا منظر پیش کرنے لگا، جس سے پیشی پر آئے سائلین خوف میں مبتلا ہو گئے۔ درجنوں افراد کے الجھنے کے باوجودعدالتی سکیورٹی پر مامور پولیس اہلکار خاموش تماشائی کا کردار ادا کرتے رہے، صورت حال کنٹرول سے باہر ہونے پر وکلاء نے بیچ بچائوکروایا، فریقین کے مابین لڑائی سیشن کورٹ کے ججز گیٹ پر ہوئی، لاہور کی سیشن عدالت میں لڑائی جھگڑے کے واقعات معمول بن چکے ہیں۔