موسم گرما کی شدت کے پیش نظر کمزور ٹائر والی گاڑیوں کو موٹر وے پر داخلہ سے اجتناب کی ہدایت

بدھ 23 مئی 2018 13:53

فیصل آباد۔23 مئی(اُردو پوائنٹ اخبارتازہ ترین - اے پی پی۔ 23 مئی2018ء) موٹر وے ایم تھری ، ایم فور پولیس نے موسم گرما کی شدت کے پیش نظر کمزور ٹائر وں والی گاڑیوں کو موٹر وے پر داخلہ سے اجتناب کی ہدایت کی ہے جبکہ اس سلسلہ میں ایس ایس پی موٹروے ایم ٹو و تھری سائوتھ کی خصوصی ہدایت پر سپیشل مہم کا بھی آغاز کردیا گیا ہے اور ہر قسم کی ٹرانسپورٹ کے مالکان بالخصوص ڈرائیورز ، کنڈیکٹرز کو ہدایت کی جا رہی ہے کہ وہ موسم گرما کی شدت میں اضافہ کے باعث کمزور ٹائروں والی گاڑیاں موٹر وے پر نہ لے کر آئیں تاکہ ایسے کمزور ٹائروں کے پھٹنے سے حادثات کا خدشہ نہ رہے ۔

(جاری ہے)

فیصل آباد ، پنڈی بھٹیاں موٹر وے ایم تھری اور فیصل آباد ، گوجرہ موٹر وے ایم فور کی موٹروے پولیس کے ذرائع نے بتایاکہ چونکہ شدید گرمی میں موٹروے پر آنیوالی کمزور ٹائروں کی حامل اکثر گاڑیوں کے ٹائر برسٹ ہو جاتے ہیں جس سے سنگین حادثات کا خطرہ رہتاہے ۔ انہوں نے کہاکہ موٹروے محفوظ سفر کی ضامن ہے اس لئے کمزور ٹائروں والی گاڑیوں کے مالکان کو چاہیے کہ وہ کمزور ٹائروں والی گاڑیاں موٹر وے پر لانے سے گریز کریں ۔