اورنج ٹرین منصوبہ پر آنے والی اصل لاگت کی تفصیلات کے حصول کیلئے ہائیکورٹ سے رجوع

اورنج ٹرین منصوبے کی اصل لاگت اور ظاہر کی جانے والی مالیت میں فرق ہے،تمام تفصیلات فراہم کرنے کا حکم دیا جائے ‘موقف

بدھ مئی 13:53

اورنج ٹرین منصوبہ پر آنے والی اصل لاگت کی تفصیلات کے حصول کیلئے ہائیکورٹ ..
لاہور (اُردو پوائنٹ اخبارتازہ ترین۔ 23 مئی2018ء) اورنج ٹرین منصوبہ پر آنے والی اصل لاگت کی تفصیلات کے حصول کیلئے لاہور ہائیکورٹ سے رجوع کر لیا گیا۔۔سول سوسائٹی کی رکن آمنہ ملک نے اظہر صدیق ایڈوکیٹ کے توسط سے لاہور ہائیکورٹ میں درخواست دائر کی جس میں موقف اپنایا گیا کہ اورنج لائن ٹرین سے متعلق اصل لاگت کی تفصیلات فراہم نہیں کی جا رہیں۔ اورنج ٹرین منصوبے کی لاگت کے بارے میں تفصیلات تک رسائی کیلئے مختلف حکام سے رابطہ کیا گیا لیکن کوئی شنوائی نہیں ہوئی۔

(جاری ہے)

درخواست گزار کے وکیل نے دعویٰ کیا کہ اورنج لائن ٹرین منصوبے کی لاگت کے بارے میں اصل اعداد و شمار کو ظاہر نہیں کیا جا رہا جو اس بات کا بات ثبوت ہے کہ اورنج لائن ٹرین منصوبے کی اصل لاگت اور ظاہر کیے جانے والی مالیت میں فرق ہے۔ وکیل نے نکتہ اٹھایا کہ آئین کے تحت ہر شہری کو معلومات تک رسائی کا حق ہے، اورنج لائن ٹرین منصوبے کے بارے میں تفصیلات فراہم نہ کرنا آئین کی خلاف ورزی ہے۔ درخواست گزار نے استدعا کی کہ عدالت اورنج لائن ٹرین منصوبے کی لاگت کی تفصیلات کے بارے میں تمام تر معلومات فراہم کرنے کا حکم دے۔