ایڈووکیٹ جنرل پنجاب اور لا افسران کی بھاری تنخواہوں اورمیرٹ کے برعکس تعیناتیوں کے خلاف دائر انٹراکورٹ اپیل پر تعیناتیوں کا طریقہ کار پیش کرنے کی ہدایت

بدھ 23 مئی 2018 19:44

لاہور (اُردو پوائنٹ اخبارتازہ ترین - آن لائن۔ 23 مئی2018ء) لاہور ہائیکورٹ کے جسٹس امین الدین خان کی سربراہی میں دو رکنی بنچ نے ایڈووکیٹ جنرل پنجاب اور لا افسران کی بھاری تنخواہوں اورمیرٹ کے برعکس تعیناتیوں کے خلاف دائر انٹراکورٹ اپیل پر تعیناتیوں کا طریقہ کار پیش کرنے کی ہدایت کر دی۔

(جاری ہے)

درخواست گزار بیرسٹر سید محمد جاوید اقبال جعفری نے موقف اختیار کیا کہ ایڈووکیٹ جنرل پنجاب اور ان کے آفس میں لا افسران کا عہدہ آئینی نوعیت کا ہے مگر تعیناتیوں کا طریقہ کار ہی موجود نہیں، انہوں نے کہا کہ حالیہ دنوں میں حکومت پنجاب نیایک نوٹیفکیشن کے ذریعے لا افسران کی تنخواہوں میں بلاجواز اضافہ کیا، انہوں نے بتایا کہ عدالتی فائل سے اپیل کے بعض حصے غائب ہیں،انہوں نے کہا کہ آئینی عہدے پر سیاسی بنیادوں پر تعیناتی آئین سے متصادم ہے،انہوں نے استدعا کی کہ عدالت ایڈووکیٹ جنرل پنجاب اور لا افسران کی میرٹ کے برعکس تعیناتیوں کو کالعدم قرار دے، جس پر عدالت نے ایڈووکیٹ جنرل آفس میں تعیناتیوں کا طریقہ کار پیش کرنے کی ہدایت کر دی، عدالت نے رجسٹرار آفس کو دائر اپیل کا گمشدہ ریکارڈ آئندہ سماعت پر پیش کرنے کی ہدایت کرتے ہوئے سماعت ملتوی کر دی۔