کامیڈین ماجد جہانگیر فاقہ کشی کا شکار ہونے پر امداد کیلیے لاہور پہنچ گئے

لاہور کی اہم شاہراہوں پر جاکر لوگوں سے امداد کی اپیل کروں گا، کامیڈین

جمعہ 25 مئی 2018 11:40

لاہور(اُردو پوائنٹ اخبارتازہ ترین - این این آئی۔ 25 مئی2018ء) معروف کامیڈین ماجد جہانگیرفالج کا مہنگا علاج کروانے اور بے روزگاری کے باعث فاقہ کشی کا شکار ہونے پر امداد کیلئے ایک مرتبہ پھر لاہور پہنچ گئے۔سندھ حکومت کو امداد کیلئے کی جانے والی اپیلوں پر اتنا وقت گزرنے کے باوجود کوئی عملدرآمد نہ ہوسکا۔

(جاری ہے)

لاہور آمد پر میڈیا سے گفتگو کرتے ہوئے ماجد جہانگیر نے بتایا کہ فالج کے مرض نے سڑک پر لاکھڑا کیا ہے۔

اپنی صلاحیتوں سے ہمیشہ لوگوں کے اداس چہروں پر مسکراہٹ بکھیری لیکن آج میں روٹی کے ایک لقمہ کو ترس گیا ہوں۔ماجد جہانگیر نے کہا کہ فن و ثقافت کے فروغ کیلیے کام کرنے والے اداروں کی اس سے بڑی بے حسی کیا ہوگی کہ کسی نے امداد کی اور نہ ہی خیریت پوچھی۔ اسی لیے میں زندہ دلان لاہور میں امداد کیلیے آیا ہوں۔ اس سلسلہ میں لاہور کی اہم شاہراہوں پر جاکر لوگوں سے امداد کی اپیل کروں گا۔