قومی کرکٹ ٹیم کے کپتان سرفرازاحمد کے اپنے ڈومیسٹک ڈیپارٹمنٹ پی آئی اے کی جانب سے 2 ماہ سے تنخواہ سے محروم ہونے کا انکشاف

ہفتہ 26 مئی 2018 20:07

کراچی (اُردو پوائنٹ اخبارتازہ ترین - آن لائن۔ 26 مئی2018ء) قومی کرکٹ ٹیم کے کپتان سرفرازاحمد کے اپنے ڈومیسٹک ڈیپارٹمنٹ پاکستان انٹر نیشنل ایئر لائن ( پی آئی اے ) کی جانب سے 2 ماہ سے تنخواہ سے محروم ہونے کا انکشاف ہوا ہے ،قومی ہاکی ٹیم کے کپتان محمد عرفان شفقت رسول بھی دو ماہ سے تنخواہ کے منتظر ہیں۔ ذرائع کے مطابق ادارے میں حاضری نہ لگانے پرپی آئی اے نے سرفراز احمدسمیت تمام کھلاڑیوں کی تنخواہ روک لی ہیں جس کے باعث کرکٹ اور پاکستان کے قومی کھیل ہاکی کے ساتھ ساتھ فٹ بال اورسکواش کے کھلاڑی بھی تنخواہ کو ترس گئے ہیں۔

اس ضمن میں رابطہ کیے جانے پر پی آئی اے کے ترجمان مشہود تاجور کا کہنا تھا کہ کسی کھلاڑی کی تنخواہ جان بوجھ کر نہیں روکی گئی ،آر پی سسٹم کے تحت تما م کھلاڑیوں کی حاضری لگتی ہے جس کے بعد ا ن کی تنخواہ آتی ہے،ممکن ہے آر پی سسٹم کی وجہ سے یہ مسائل پیدا ہوئے ہوں ،یہ انتظامی مسئلہ ہے جو ایک سے دو روز میں حل کرلیں گے۔

(جاری ہے)

ترجمان پی آئی اے کا مزید کہناتھا کہ موجودہ پاکستانی ٹیم کے کھلاڑی حاضری سے مستثنیٰ ہیں،کھلاڑی یا ان کے شعبے نے لسٹ اپ ڈیٹ نہیں کی ہوگی جس کی وجہ سے یہ معاملہ سامنے آیا۔یاد رہے کہ سرفراز احمد نے اپنے کرکٹ کیریئر کا آغاز ہی پی آئی اے سے کیا تھا اور اپنے کیریئر کا بہت بڑا حصہ اسی ڈیپارٹمنٹ کے لیے کھیلتے ہوئے گزارہ ہے۔