بنوں،فاٹاکو خیبر پختون خوا میں ضم کرنے کی خوشی میں عوامی نیشنل پارٹی نے مشعل بردار ریلی نکالی

بنوں (اُردو پوائنٹ اخبارتازہ ترین - آن لائن۔ 26 مئی2018ء) فاٹاکو خیبر پختون خوا میں ضم کرنے کی خوشی میں گزشتہ شب عوامی نیشنل پارٹی بنوں نے مشعل بردار ریلی نکالی اور انضمام کے فیصلے کو ملکی استحکام کا ضامن قرار دے دیامیلاد پارک بنوں سے نکالی جانے والی ریلی مختلف راستوں سے ہوتی ہوئی بنوں پریس کلب پہنچی جہاں پر شرکاء سے خطاب کرتے ہوئے اے این پی کے ضلعی صدر حاجی عبدالصمد خان ،شیر ولی باغی ،عرفان پیر زادہ ایڈووکیٹ، ندیم عسکر،این وائی او کے صوبائی رہنماء حکمت پختون ،این وائی او کے ضلعی صدر مرید حیات، پختون سٹوڈنٹس فیڈریشن کے ضلعی صدر حامد سورانی ، انور باچہ، عبدالصمد خان و دیگر نے کہا کہ فاٹاکو خیبر پختونخوا میں انضمام سے ہمارا مطالبہ پور ی طرح مکمل نہیں ہوا بلکہ یہ تو ہماری منزل کی طرف قدم ہے اب دوسرے مرحلے میں ان حقوق کیلئے جدو جہد کریں گے جس سے فاٹا کے عوام کو گزشتہ 70سالوں سے محروم رکھا گیا جبکہ تیسرے مرحلے میں ملک میں جائز اختیار مانگیں گے جو اختیار پشتون اکابرین کا ہمیشہ سے چلا آ رہا تھا اور اس جدو جہد میں ہم اُن بھائیوں کو بھی ساتھ لیکر چلیں گے جو فاٹا انضمام پر ناراض ہیں ہم اُنہیں انشاء اللہ منائیں گے اُنہوں نے کہا کہ عوامی نیشنل پارٹی روز اول سے فاٹا انضمام کیلئے کوشاں تھی فاٹا کے عوام نے بہت سی تکالیف اُٹھائی اب وقت آ گیا ہے کہ یہاں پر ترقیاتی کام کئے جائیں اور حلقہ بندیوں پر کام مکمل کیا جائے تاکہ قبائلی عوام آنے والے انتخابات میں صوبائی اسمبلی کیلئے اپنے نمائندہ منتخب کر سکیں