گورنر سندھ کی ایران کے قونصل جنرل کی دعوت افطار میں شرکت

پاکستان اور ایران تاریخ و ثقافت اور اسلامی اخوت کے لازوال رشتہ میں بندھے ہوئے ہیں،گورنرسندھ محمد زبیر

ہفتہ مئی 21:28

گورنر سندھ کی ایران کے قونصل جنرل کی دعوت افطار میں شرکت
کراچی ۔ (اُردو پوائنٹ اخبارتازہ ترین۔ 26 مئی2018ء) گورنرسندھ محمد زبیر نے کہا ہے کہ پاکستان اور ایران تاریخ و ثقافت اور اسلامی اخوت کے لازوال رشتہ میں بندھے ہوئے ہیں یہی وجہ ہے کہ دونوں ملکوں کے عوام کے دل ایک ساتھ دھڑکتے ہیں۔ جاری کردہ اعلامیہ کے مطابق ان خیالات کا اظہار انہوں نے ہفتہ کو ایران کے قونصل جنرل احمد محمدی کی جانب سے دیئے گئے افطارڈنر کے موقع پر کیا۔

اسپیکر سندھ اسمبلی آغا سراج خان درانی ، ڈپٹی اسپیکر سیدہ شہلا رضا،، سابق صوبائی وزرائے اعلیٰ سید قائم علی شاہ ، سید غوث علی شاہ ، مختلف اسلامی ممالک کے سفارت کاروں کے علاوہ کاروباری برادری کے اہم افراد بھی اس موقع پر موجود تھے۔ گورنر سندھ نے کہا کہ دونوں ممالک کے درمیان تاریخی روابط ہیں جبکہ ہر سال پاکستانی زائرین کی ایک بڑی تعداد ایران میں موجود مقامات مقدسہ کی زیارت کرنے جاتی ہے۔

(جاری ہے)

انہوں کہا کہ قدرتی و ناگہانی آفات کے دوران امدادی کاموں میں بڑھ چڑھ کر حصہ لینے پر صوبہ کے عوام ایرانی عوام کے مشکور ہیں ۔ انہوں نے کہا کہ آج کا کراچی 2013ء سے بالکل مختلف ہے ۔ انہوں نے کہا کہ بہتر امن و امان کی بدولت اب ملک کے معاشی مرکز میں سرمایہ کاری کے لئے حالات نہایت سازگار ہیں اور دنیا بھر کے سرمایہ کار ان اسے استفادہ کررہے ہیں انہوں نے ایران کے سرمایہ کاروں کو بھی صوبہ میں مزید سرمایہ کاری کی دعوت دی ۔ قونصل جنرل احمد محمدی نے گورنر سندھ کی آمد پر ان کا شکریہ ادا کیا۔