محمد نواز شریف نی ایٹمی دھماکے کر کے پاکستان کے دفاع کو ہمیشہ ہمیشہ کے لیے ناقابل تسخیر بنا دیا، برجیس طاہر

اتوار مئی 16:30

اسلام آباد ۔ (اُردو پوائنٹ اخبارتازہ ترین۔ 27 مئی2018ء) وفاقی وزیر اُمور کشمیر و گلگت بلتستان چوہدری محمدبرجیس طاہر نے کہا ہے کہ محمد نواز شریف نے بھارت کے ایٹمی دھماکوں کے جواب میں ایٹمی دھماکے کر کے پاکستان کے دفاع کو ہمیشہ ہمیشہ کے لیے ناقابل تسخیر بنا دیا ، بیس سال قبل اس بہادرانہ فیصلے کہ بدولت آج پاکستان کا دفاع ناقابل تسخیر بن چکا ہے اور بھارت پاکستان کی طرف میلی آنکھ سے دیکھ بھی نہیں سکتا ۔

انہوں نے یہ بات یوم تکبیر کے حوالے سے اپنے خصوصی پیغام میں کہی ہے جو آج(پیرکو) منایا جارہاہے۔ انہوں نے کہا کہ نواز شریف نے دنیا سے آنیوالی آفرز کو ٹھکراتے ہوئے صرف اور صرف وسیع ترقومی مفاد میں فیصلہ کیا جس کے خطے میں طاقت کے توازن اور استحکام کے حوالے سے مثبت اثرات آنے والی کئی نسلیں دیکھ رہی ہیں ، اس وقت اگر نواز شریف نے ایٹمی تجربے کا بہادرانہ فیصلہ نہ کیا ہوتا تو بھارت پاکستان کے خلاف کب کا انتہائی اقدام کر چکا ہوتا ، انہوں نے کہا کہ آج بھارت کو بخوبی علم ہے کہ پاکستان ایک جوہری طاقت ہے اور پاکستان کے خلاف کسی قسم کا انتہائی اقدام خود بھارت کی تباہی کا سبب بنے گا ، یہی وجہ ہے کہ بھارت پاکستان کے خلاف اپنے مزموم مقاصد کی تکمیل کے لیے کولڈ سٹارٹ ڈاکٹرائن کے تحت پاکستان کو غیر مستحکم کرنے کے لیے کلبھوشن یادیو کی صورت میں دہشت گردی پھیلانے میں مصروف ہے جس کو مسلم لیگ ن کی حکومت اور پاکستان کے سیکورٹی اداروں نے آپریشن ضرب عضب کے ذریعے ناکام بنا دیا ہے۔

(جاری ہے)

وفاقی وزیر نے کہا کہ بھارت نے مقبوضہ کشمیر میں نہتے کشمیروں پر انسانیت سوز مظالم سمیت پاکستان کے خلاف تخریبی کاروایوں اور آبی جارحیت کا جو سلسہ شروع کر رکھا ہے اس کا خطے کی سا لمیت کے حوالے سے خطرناک نتائج برآمد ہوں گے، ایک طرف بھارت مکاری کا مظاہرہ کرتے ہوئے رمضان کے بابرکت مہینے میں کشمیریوں کے خلاف ریاستی دہشت گردی روکنے کا اعلان کرتا ہے تو دوسری جانب وہ روزانہ کی بنیاد پر نہتے کشمیری نوجوانوں کو شہید اور ایل او سی اور ورکنگ باونڈری پر بلااشتعل فائرنگ کا سلسلہ جاری رکھے ہوئے ہیں۔

چوہدری محمد برجیس طاہر نے کہا کہ آج یوم تکبیر والے دن ان عناصرکا بھی محاسبہ کرنا ہو گا جو اپنے اقتدار کے حصول کی خاطر نواز شریف جیسے محب وطن قائدپر بے بنیاد اور من گھڑت الزامات لگا رہے ہیں ، طاقت اور اقتدار کے حصول کی خاطر مخالفین کے ان بے بنیادالزامات سے ملک کو ناقابل تلافی نقصان پہنچ رہا ہے، ا پاکستان کے عوام باشعور ہیں اور وہ اچھی طرح جانتے ہیں کہ کس سیاسی لیڈر نے ملک کو حقیقی خوشحالی کی راہ پر گامزن کرنے کے لیے سی پیک جیسے عظیم منصوبے شروع کیے اور کن سیاسی قائدین نے گزشتہ پانچ سالوں میں محض دھرنے دیے اور اپنے اثاثے بڑھانے کے لیے سندھ کو کھنڈرات میں تبدیل کر دیا ۔

انہوں نے کہا کہ 25 جولائی کو پاکستان کے عوام ایک با ر پھر ثابت کریں گے کہ وہ ترقی و خوشحالی اور نواز شریف کے ساتھ ہیں اور مسلم لیگ ن عوام کے ساتھ مل کے ان تاریخ ساز منصوبوں کو تکمیل کے ذریعے پاکستان کو معاشی لحاظ سے بھی ناقابل تسخیر بننے کا سفر مکمل کریں گے۔