سندھ کے ریٹرننگ آفسران کی تربیت کا دوسرا مرحلہ اختتام پذیر ہوگیا

اتوار 27 مئی 2018 17:40

کراچی ۔ (اُردو پوائنٹ اخبارتازہ ترین - اے پی پی۔ 27 مئی2018ء) عام انتخابات 2018ء کے لئے کراچی سمیت سندھ بھر کے ریٹرننگ آفیسرز کی تین روزہ انتخابی تربیتی سیشن کا دوسرا مرحلہ کراچی، حیدرآباد اور سکھر میں اختتام پذیر ہوگیا۔ اتوار کے روز کراچی میں صوبائی الیکشن کمشنر سندھ محمد یوسف خان خٹک نے اختتامی تقریب سے خطاب میں کہا کہ ریٹرننگ آفیسرز الیکشن کمیشن کے ضابطہ اخلاق پرسختی سے عملدرآمد کروائیں اور اپنی کارکردگی سے عام انتخابات کو مثالی بنانے میں اہم کردار ادا کریں۔

(جاری ہے)

انہوں نے مزید کہا کہ الیکشن کمیشن کی جانب سے ڈسٹرکٹ ریٹرننگ آفیسرز سمیت تمام ریٹرننگ آفیسرز کو سرکاری گاڑیاں اور دیگر سہولیات دی گئی ہیں جبکہ الیکشن کمیشن نے انتخابی عمل میں حصہ لینے والوں کو پچھلے انتخابات کی نسبت زیادہ فنڈز دیئے جائیں گے۔ انتخابی تربیتی سیشن میں ریٹرننگ آفیسرز کے ساتھ ڈسٹرکٹ الیکشن کمشنرز بھی شامل ہوئے۔ الیکشن کمیشن کے تجربے کار ماسٹر ٹرینرز نے ریٹرننگ آفیسرز کو انتخابی تربیتی سیشن کروائے۔ واضح رہے کہ تین روزہ انتخابی تربیتی سیشن مرحلہ وار 31 مئی تک جاری رہے گا۔